Espainiako Auzitegi Konstituzionalak aho batez onartu ditu Rajoyren gobernuak Kataluniako galdeketa egin ez dadin jarri dituen helegiteak. Erabakiak bertan behera utziko ditu Kataluniako kontsulta legea eta azaroaren 9ko erreferendumaren deialdia.
Ordubete inguru baino ez du iraun Konstituzionaleko hamabi epaileen ezohiko bilerak. Gehienez bost hilabeteko iraupena du hartu duten erabakiak.
Bitarte horretan, kontsultaren suspentsioa behin behinekoa izango da eta epaileek epea bukatuta sententziarik emango ez balute, suspentsioari eutsi diezaiokete.
Honaino iristen da aurreikusi zitekeena
Azken hilabeteetako adierazpenak eta gertakariak ikusirik, aurreikusi zitekeen honelako neurriak etorriko zirela Espainiako Estatuaren partetik. Alde horretatik, gaurkoa Rajoyren gobernuak eta epaileek egin duten eszenifikazio gisa ulertu behar da.
Hain argi ez dagoena zera da nola erantzungo duten independentziari buruzko galdeketa sustatu duten alderdi eta eragileek.
Informazio gehiago:
Alderdi kataluniarren artean dauden jarrerez eta herritarrek dituzten iritziez erreportaje zabala argitaratu dugu hilabete honetan bertan: "Katalunia, galdeketa airean" (2014-09-21).