Etenik gabeko mobilizazioari ekin diote kalean Kataluniako herritarrek

  • Urriaren 1ean Kataluniako herritarrak autodeterminazio erreferendumean bozkatzera deituta daude, beren legebiltzarrak hala erabakirik. Espainiako Gobernuak, aldiz, hura eragotziko duela agindu du. ARGIA kanpainaren eta gertakizunen jarraipena egiten ari da zuzenean. 

ARGIA @argia
2017ko irailak 21
Gakoak
Generalitateak hautes-mahaiak osatzeko dei eginez 55.000 gutun bidali ditu

Kataluniako Generalitateak zozketaz hautatutako 55.000 laguni erreferendumaren egunean hautes-mahaiak osatzeko dei eginez gutunak bidali dizkie, El Paísen irakur daitekeenez. Pertsona hauen artean daude titularrak eta ordezkoak, orotara 6.300 hautes-mahai betetzeko beharrezkoak.

Espainiako Gobernuak hauteslekuetako elektrizitatea mozteko mehatxu egin du

Gaur El Mundo egunkariak azalean dakarrenez, Espainiako Gobernua prest dago urriaren 1ean hauteslekuetako argindarra mozteko.

Horrela laburbildu du egunkariak Espainiako Gobernuaren ikusmoldea: "Ekidin hauteslekuen irekiera, hautes-mahaien osaketa, boto kutxen kokatzea, boto-paperen banatzea eta proigrama informatikoen erabilera. Horiek dira Rajoyren helburuak, ez dadin "2014ko azaroaren 9" berri bat gertatu, alegia, herritarren begietara legaltasun itxura duen fartsa bat".

Espainiako Gobernuak ez dio Generalitateari utzi nahi "mundu osora prozesu demokratiko homologatu baten irudia zabaltzen".

Herri harresiak egitea proposatu du Arranek atxilotu nahi dituzten alkateak babesteko

Espainiako fiskaltzak deklaratzera deitu eta honi uko egiteagatik atxilotzeko arriskuan dauden alkateak babesteko "ehunka pertsonako herri harresiak" egitea proposatu du Arran gazte antolakundeak, komunikatu baten bidez "Beren errepresioaren aurrean, defenda gaitezen" izenburupean.

Herritarrei kalera atera, elkar antolatu eta erreferenduma babesteko mobilizatzera dei egin diete.

"Guri, dena kentzen digun sistema bateko desjabetuei, ez zaigu gure esku eta gorputzak besterik geratzen; ez dugu beste ezer geure buruak defendatzeko, eta horrela defendatuko dugu geure burua. Egin ditzagun poliziak atxilotu nahi dituen alkateen inguruan herritarren harresiak, eta babesteko beharrezko bada, okupa ditzagun udaletxeak. Hamarnaka, ehunka, milaka pertsona izango gara geure buruak defendatzen, agonizatzen ari den eta herritarren borondatea gerarazi nahian ari den estatu baten aurrean".

 

Gaur hasiko da baiezkoaren aldeko kanpaina, ekitaldi bateratu batekin

 Alderdi eta eragile soberanistek kanpaina abiatuko dute Tarragonan, ekitaldi jendetsu batekin.

Ekitaldia lau bloketan banatua egongo da, Vilaweben irakur daitekeenez. Hasteko, PDECat, ERC, CUP, Demòcrates eta MES alderdietako kideek hitz egingo dute eta U1a defendatuko dute.

Bigarrenik, ANC, Independentziaren Aldeko Udalerrietako eta Omnium Cultural-eko kide banak hitz egingo dute.

Hirugarrenik, ANCk kanpainako spota publiko egingo du. Eta azkenik, Generalitateko presidente eta presidente ordeak itxiko dute ekitaldia: Carles Puigdemont eta Oriol Junqueras.

Kanpaina Bartzelonan amaituko dute, irailaren 29an, ostiralarekin.

Puigdemont: "Konstituzio Epaitegiak ez du erreferenduma aldatuko"

Presidenteak alkate soberanistak eta Esquadra Mossoak defendatu ditu TV3en audientzia handieneko tartean egindako elkarrizketan. Espainiako gobernuaren estrategia kritikatu du gogor Vilaweben jaso dutenez.

Puigdemontek nabarmendu du katalanek bozkatzeko aukera izango dutela: "mundu lokalaren kolaborazioa izan badezakegu, bikan; eta ezin bada, ez da ezer gertatzen", adierazi du hainbat Udalek bozkalekuak uzteko ezezkoaren aurrean. "Bartzelonan bozkatu ahal izango da", ziurtatu du.

 

Espainiako Estatuak erreferendumaren webgunea saretik ezabatu nahi izan du, ez du lortu

Guardia Zibilak webgune nagusia itxi du, baina minutu gutxira Generalitateak beste bi ireki ditu.

Webgunea zerbitzaritik kendu ostean, Carles Puigdemont presidenteak iragarri du bi domeinu berritan aurki daitekeela erreferendumari buruzko informazioa: ref1oct.cat eta ref1oct.eu.

CUPek iragarri du bere alkateak ez direla Espainiako fiskaltzaren aurrean deklaratzera joango

Espainiako Estatuko fiskal nagusiak deklaratzera deitu ditu urriaren 1eko erreferenduma babesteko dekretua sinatu duten alkate guztiak. 700 baino gehiago dira. CUPek berehala erantzun du bere alkateak ez direla joango eta gainontzeko alkateei gauza bera egiteko gonbidapena egin die.

CUPek salatu du Estatuko Fiskaltza Orokorrak ezin duela alkateen atxiloketa agindu, bere konpetentzietatik harago joatea litzatekela. "Espainiako estatuaren ekinbide demofobikoa eta oinarrizko eskubideen aurkako erasoak salatu nahi ditugu, kargu publikoak eta herritarrak beldutzea beste helbururik ez dute".

Estatuaren estrategiaren aurrean erantzun kolektiboak emango dituztela iragarri dute.

Erreferenduma babestu duten alkate guztiak deklaratzera deitu ditu Espainiako Estatuko fiskaltzak

Kataluniako erreferenduma babestu duten alkate guztiak deklaratzera deitu ditu Espainiako Estatuko fiskaltzak. 700 baino gehiago dira eta deklaratzera ez doazenak atxilotzeko agindu du.

Jose Manuel Maza Espainiako Estatuko fiskal nagusiak, Esquadra Mossoei agindu die atxilotzeko deklaratzera agertzen ez diren alkateak. Erreferendumaren Aldeko Udalerrien ordezkariak arratsaldean bildu dira eta agerraldia egingo dute erabakitzen dutena jakinarazteko.

Agindutakoaren arabera, Bartzelona, Tarragona, Lleida eta Gironako fiskalei diligentziak hasteko eskatu zaie alkateen zerrenda bat oinarri hartuta, urriaren 1eko autodeterminazio erreferendumaren prestaketan laguntzen ari direlakoan.

<< <
1 2 3 4
> >>
Kanal honetan artxibatua: Kataluniako erreferenduma

Kataluniako erreferenduma kanaletik interesatuko zaizu...
Estelada ez da soilik independentzia

Estelada XXI. mendean demokraziari eman zaion arnasa berritua da. Legedia demokraziaren eta gehiengo baten eskuetan jartzea da. Estelada momentua eta oraina da. Demokraziak derrigorrezkoak zituen, ditu eta izango ditu berrirakurketak. Estelada demokrazia da XXI. mendean.


2017-09-21 | Xalba Ramirez
Urkullu: "Aldebikotasunaren bidez akordioak lortzeko eredua da Euskadi"

Eusko Legebiltzarreko Politika Orokorreko Plenoan, Iñigo Urkullu Lehendakariak Kataluniako egoera zeharka soilik aipatu du eta ez du erabakitzearen eskubidearen aldeko aipamenik egin. EH Bilduko parlamentariek demokraziaren aldeko kamisetak dituzte soinean.


2017-09-20 | Xabier Letona
Errepresioaren aurrean, herritarren iraultza

Tentsioa goraka zihoan, baina dena polikiago joango zela ere pentsatzen zen. Gaur dena lehertu da eta Espainiako Gobernuak bere epaileen bidez agerian utzi du salbuespen egoera, hori bai, oraindik legalki indarrean jarri gabe.


2017-09-20 | ARGIA
Nazioarteko egunkari nagusiek poliziaren "asaltoa" eta "errepresioa" nabarmendu dituzte

Egunkariek tentsioaren gorakada islatu dute, kalean erreferendumaren aldekoen protestan ikusten diren argazki ikusgarriekin eta toki handia emanez gaiari.


2017-09-20 | ARGIA
Urkullu: "Gasolina botatzen ari dira sua amatatzeko asmoz"

"Itzulbiderik gabeko punturantz urratsak ematen jarraitzen dute Estatuko botereek Katalunian" adierazi du Iñigo Urkullu Eusko Jaurlaritzako lehendakariak.


2017-09-20 | ARGIA
EH Bilduk mobilizazioak deitu ditu udaletxe guztien aurrean Kataluniarekin elkartasunez

"Autonomien Estatua hilda dago eta beraiek akabatu dute", esan du Otegik. "Eusko Alderdi Jeltzaleak bere jarrera zuzendu behar du, bestela konplize izango da".


2017-09-20 | ARGIA
Puigdemont: "Espainiako Estatuak autogobernua eten du"

Kataluniako presidenteak asteazken goizeko operazioaren ondoren adierazpenak egin ditu Generalitatearen egoitzan.


2017-09-19 | Asier Blas
Erabakitzeko eskubidea jokoan

Egia da Iñigo Urkullu lehendakariak esan duena, erreferendum saiakera horretatik ezin da atera estatu berri baten jaiotza. Baina horren errua ez da Kataluniako Gobernu eta Parlamentuarena, baizik eta Espainiako Gobernu eta Parlamentuarena.


Azkenak
EGILEA
Eguneraketa berriak daude