Maiatzaren 4an Kanbon egingo den bakerako nazioarteko ekitaldian Jaurlaritzak ez duela parte hartuko azaltzeko, Josu Erkoreka EAEko Gobernuko bozeramaileak esan du ETAk “Euskadin” izan duela eragin handiena eta Kanbo “Euskaditik” kanpo dagoela.
Radio Euskadin egin dioten elkarrizketa baten ondoren eman du azalpena Erkorekak Twitter bidez eta berehala eragin ditu erreakzioak sare sozial horretan, tartean Arnaldo Otegi EH Bilduko koordinatzaile orokorrarena.
Beste zenbait erabiltzailek gogora ekarri diote GALek, adibidez, Ipar Euskal Herrian egin zituela atentatu gehienak.
Bestalde, Onda Vasca irratiari eskainitako elkarrizketan, Koldo Martinez Geroa Baiko parlamentuko bozeramaileak adierazi du, Nafarroako Gobernuak ere ez lukeela Kanbora joan beharko eta ekitaldiaren antolakuntza kritikatu du, oraindik ez dituztelako haren inguruko xehetasunak ezagutzen. Martinezen esanetan, Geroa Baik horregatik ez du erabaki oraindik joango den ala ez.