Joseba Arregi (Andoain, 1946 - Zarautz, 2021) Eusko Jaurlaritzako Kultura sailburua izan zen 1984-85 eta 1987-1995 artean, baita bozeramailea ere bigarren epealdi horretan, Jose Antonio Ardanzaren gobernuan. 2001era arte EAJren legebiltzarkidea izan zen, eta hiru urtera alderdia utzi zuen, desadostasunak zirela-eta. 75 urte zituela hil da.
Teologian eta Soziologian doktore, Rikardo Arregi kazetaria anaia zuen. EAJren Gipuzko Buru Batzarreko buru eta Euskadi Buru Batzarreko kide izana da, legebiltzarkide izendatu aurretik. Ibilbide politikoa amaitu ostean, Soziologia irakaslea izan zen EHUn, 2011ra arte.
EAJren ildo estrategikoarekiko "distantzia handia"
2001ean utzi zuen politika Arregik, Eusko Legebiltzarreko hauteskundeetan bere alderdiaren zerrendetan aurkezteari uko eginda. Alderdia bera 2004an utzi zuen. Orduan azaldu zuen "asko pentsatutako hausnarketa" baten ondorio izan zela erabakia, ez gertakari jakin bati lotua, eta "oinarrizko gaietan distantzia handia" zuela EAJren ildo estrategikoarekiko, Jon O. Urain kazetariak nabarmendu bezala Berria egunkarian plazaratutako artikuluan. 2001eko bozen aurretik, bere erabakiaren berri ematean, azaldu zuen gobernu egokiena EAJ-PSE-EE aliantza litzatekeela, eta, bestela, EAJ-PSE-EE-PP "kontzentrazio" gobernu bat. PSE-EErantz mugituz joan zen urte horietan, eta, 2004ko azaroan, Aldaketa plataforma aurkeztu zuen, "euskal kultura politikoa birsortu" eta Jaurlaritzan "alternantzia" egon zedin babesteko. Basta Ya plataformaren inguruan ibili zen orduan, eta ETAk mehatxatuta bizi izan zen, Berrian irakurri daitekeenez.
“Sailburu hiru aldiz izan ondoren, Lehendakari edo Aita Santu izatea tokatuko litzaidake” (ARGIA, 2009)
Fermin Etxegoienek elkarrizketa laburra egin zion Arregiri ARGIAren 2189. zenbakian. "Batzuentzat, aitaren etxea abandonatu zuen traidorea. Besteentzat, gizarte aske eta irekiaren aldeko ahots ozena", idatzi zuen sarre moduan.