Itziar auzo udal bihurtuko da

  • Gipuzkoako Foru Aldundiak asteartean onartu du Itziar auzo Udal bihurtzea. Egindako bi galdeketetan auzo udalaren aldeko jarrera nabarmendu da.


2015eko urtarrilaren 30an - 05:11
Denon Herria plataformaren agerraldia, Itziarko frontoian. (Argazkia: Denon Herria)

Prozesu luze baten ostean, azkenik, Itziar auzo udal bihurtuko da, nahiz eta, bost urte beharko dituzten auzo udalari dagozkion eskumen guztiak lortzeko.

Hurrengo hauteskundeak iritsi arte Batzorde kudeatzaile baten esku geratuko da auzo udala.

Hemendik aurrera Itziarrek pertsonalitate juridikoa izango du, eta Itziarko kaskoa, Arbiskoa, Arriola, Egia, Elorriaga, Endoia, Itxaspe, Lastur Behea, Lastur Goia eta Mardari auzoen gaineko eskumenak izango ditu.

48 kilometro karratuk osatuko dute auzo udalaren lur eremua.

Udalaren onarpena

2014ko uztailean onartu zuen Debako Udalak, Alternatiba agintean zelarik, Itziar Auzo Udal bihurtzeko proposamena.

Orain Gipuzkoako Aldundiaren onarpenarekin, hiru zatitan banatutako prozesua abiatuko dute.

Pixkanaka joango dira eskumenak hartzen, eta eskumen horien arabera Debako Udalak diru kopuru bat emango dio.

Auzo udalak, alkatea eta bost herritarrez osatutako batzordea izango ditu.

Herritarren nahia

Auzo udalaren inguruko bi galdeketa egin dituzte Itziarko kaskoan eta auzoetan.

Lehenengo galdeketa Maiatzaren 25ean egin zuten Europako hauteskundeak baliatuz. Galdeketa hori Denon Herria auzo udalaren aldeko plataformak antolatu zuen, eta beraz, ez zen loteslea izan. Hala ere, emaitza garbia izan zen: bozen %94,7 auzo udalaren alde.

Azaroaren 30ean egin zuten bigarren galdeketa, oraingoan Debako Udalak galdetu zuen. Erantzunak, maiatzeko ondorio bera bistaratu zuen: bozen %96 auzo udalaren alde.

Aspaldiko aldarria

Hamarkadetan desanexioaren aldarria nagusitu zen Itziarko herritarren artean. Herria Sortzen plataforma sortu zuten horretarako. Baina eztabaida urte luzez ez atzera ez aurrera geratu zela ikusirik, auzo udalaren bideari heldu zioten.

Denon Herria plataforma sortu zuten auzo udalaren alde lan egiteko, hainbat pertsona ezagunen babesarekin eta elkarte horrek bideratu du geroztik Itziarren erabakitzeko nahia.

Informazio gehiago:

Itziarkoa bezalako kasu gehiago badira Euskal Herrian. Horiei buruzko erreportajea landu zuen Unai Break ARGIAren 2.438. zenbakian: "Erabakitzeko eskubidea udal mailakoa ere bada".


Kanal honetatik interesatuko zaizu: Erabakitzeko eskubidea
Gure Esku-k ‘Herri libre bat’ dinamika aurkeztu du

Datozen bi urteetako erronken berri eman du erabakitze eskubidearen aldeko ekimenak larunbatean Bilboko Kafe Antzokian. “Herri libre bat nahi dugu, mugimendua sortu nahi dugu, herria martxan jarri eta elkarlana bultzatu nahi dugu”, adierazi dute.


2024-03-04 | Ahotsa.info
Nafarroako autogobernua eta herritarren borondate demokratikoa errespetatzea eskatu dute Iruñean

"Nafarroa defendatu" manifestua kaleratu eta sinatu duten 120 alkateek egindako deialdiari erantzunez, Iruñeko Sarasate Pasealekuan elkarretaratzea izan da larunbat arratsaldean. Auzitegi Gorenak Trafikoaren eskumena Nafarroari transferitzea baliogabetzea... [+]


Espainiako Vueltan errepideak euskal ikurrez betetzeko deia egin dute astebururako

Gure Esku eta Nafarroa Berriz Altxa elkarteek ekimenak antolatu dituzte lasterketa Euskal Herritik igarotzen denerako. "Euskal Herriaren erabakitzeko eskubidea" aldarrikatu eta "muga artifizialak" auzitan jarri nahi dituzte, besteak beste.


Aterik itxi gabe, Espainian hoztasunez jaso da Urkulluren proposamena

Urkullu lehendakariak konbentzio konstituzionalaren proposamena egin du Espainiako Estatuan autogobernuaren eztabaidan sakontzeko eta estatu plurinazionalaren egiazko aitortza egin dadin.


Eguneraketa berriak daude