Espainiako Gobernuak irailaren 8an azaldu zuen asmoa zuela "Israeli armen salmenta eteteko Errege-Lege Dekretu bat onartzeko", Gazako genozidioaren ondoriozko gero eta presio handiagoa zela eta. Espainiako Ministroen Kontseiluak itxurazko "borondate" hori berretsi zuen gerora, askoz lehenago iragarri zena berez, baina faltsua zela frogatu da.

Orain berriz atzeratu dute dekretuaren onarpen formala, irailaren 23ra arte. Nazio Batuen Erakundearen Batzar Nagusiarekin batera izango litzateke, "Palestinako Estatuaren onarpena" eta genozidioaren "gaitzespena" eztabaidatzeko, nahiz eta inork ez dakien zehazki zertaz ari diren Palestinako Estatuaz hitz egiten dutenean; ez lurralde mailan, ez subiranotasun mailan. Genozidioa gelditzeko ekintza zehatzik ere ez dute proposatzen.

Espainiako Gobernuak, bestalde, "konplexutasun teknikoari eta nazioarteko araudiaren eraginari" leporatu dio atzerapena. Antza denez, Ukrainan eskala handiko gerra hasi ondoren 2022an Errusiaren aurka ezarritako zigorrak eta enbargoa baino askoz konplexuagoa da teknikoki.

Atzerapen horrek areagotu egin ditu Espainiako Gobernutik kanpoko eta barruko kritikak, batez ere Palestinaren aldeko mugimenduarenak, salatu baitu armen enbargoa ez dagoela indarrean, nahiz eta aldez aurretik baieztapen ofizialak egon diren. Palestinako Okupazioaren aurkako Sare Solidarioak (RESCOP) "gezurtzat" jo ditu Pedro Sanchez presidentearen adierazpenak, Centre Delásen txostenak aipatuz, 2023ko urritik estatu kolonial genozidari egindako armen salmentaren gorakada historikoa erakusten baitute.

Antonio Maíllo Izquierda Unidako (IU) koordinatzaile nagusiak "frustrazioa" agertu du kudeaketagatik, eta, "enbargoa onartu ezean, hurrengo Ministroen Kontseilura ez joateko" eskatu die Sumarreko ministroei. Maíllok, hala, "akats" gisa hartu du atzerapena. Bestalde, Tesh Sidi Sumarreko diputatuaren esanetan, gobernuaren "neurriak babesten" dituen arren, uste du "ahaleginak" ez direla "nahikoa", eta "erabakiak azkartzeko" beharra nabarmendu du.

Hala ere, adierazpen horiek guztiak ez datoz bat honako gertaera honekin: 2023ko urriaz geroztik, "gobernu progresista" osatzen duten IU-Sumarreko ordezkariak 96 aldiz eseri dira Ministroen Kontseiluan genozidioarekin zuzenean kolaboratzen dutenekin batera, gobernua hausteko mehatxu larririk izan gabe. Oraingo honetan, gainera, Maíllok proposatu du Ministroen Kontseilutik alde egitea; eta ez gobernu kolaborazionistarekin haustea.

Genozidioaren konplize den gobernuak harrotasunez esan du "Israelgo Estatuarekin bi armamentu kontratu eten" dituela, "ia 1.000 milioi euroko" balioa zutenak, baina RESCOPek gogorarazi du Moncloak behin baino gehiagotan esan duela gezurra gai horri buruz. Enbargoa integrala eta atzeraeraginezkoa izatea eskatzen du, kasu komertzial guztiak kontuan hartuta eta 2023ko urritik indarrean dauden 46 kontratuak baliogabetuta. Presio sozial eta politikoak aktibo jarraitzen du genozidioak eta neurri eraginkorrik ezak irauten duten bitartean.