"Ekintza koldar hori ahots humanitario eta mediku nabarmenenetako baten aurka egin dute; izan ere, Marwan Al-Hamsek mundu osora helarazi ditu ume gosetuen agonia, sendagairik gabeko zaurituen mina eta amen negarra ospitaleen atarietan", adierazi du Gazako Osasun Ministerioko taldeak ohar batean.

Al-Hamsen desagerpenaren berri izan baino ordu batzuk lehenago, Osasun Ministerioak eguneroko estatistikak argitaratu zituen. Uztailaren 21eko hilketak kontuan hartu gabe, 2023ko urriaren 7tik 59.029 pertsona hil eta 142.135 zauritu dira Israelen erasoen ondorioz.

Al-Hamsen atxiloketaren garrantzia parekatu dute 2024ko abenduaren 27an Hussam Abu Safiya pediatra atxilotu zutenekoarekin. Kamal Adwan ospitaleko zuzendaria zen eta sionistek atxilotu egin zuten Gaza iparraldeko azken ospitaleko bonbardaketaren ondoren, eta argazkiak munduari bira eman zion.  Ondoren, Abu Safiya Sde Teiman kontzentrazio-esparruan espetxeratu zuten, eta ordutik han dago preso.

Uztailaren 15ean, Aministia Internazionalak Abu Safiyaren gatibu-baldintzez ohartarazi zuen, eta zehazki torturak sufritu izana aipatu zuten: "Duela bi aste ia 30 minutuz jo zuten bizkarrean, aurpegian eta lepoan atsedenik gabe. Abu Safiya eta beste preso batzuk oso baldintza eskasetan bizi dira ", azaldu zuen erakunde horrek," lurpeko ziega batean daude, eguzkiaren argia ikusi gabe, ez dute mediku arretarik jasotzen eta ia ez diete jatekorik ematen. Hussamek ia 40 kilo galdu ditu ".

"Jendea inguratzen duen guztia heriotza da", dio UNRWAk.

Gazako egoera izugarria da. "Une honetan jendea inguratzen duen guztia heriotza da, direla bonbak, direla erasoak, dela desnutrizioaren, deshidratazioaren eta heriotzaren ondorioz gure begien aurrean kontsumitzen ari diren haurrak", jaso du uztailaren 21eko txosten batean Ekialde Hurbileko Palestinako Iheslarientzako Nazio Batuen Agentziak (UNRWA).

Nazio Batuen Erakundeko agentzia horrek xehetasun gehiago eman ditu igandean gertatutako erasoaz. Izan ere, Elikagaien Munduko Programako (EMP) 25 kamioik Zikimeko muga-puntua zeharkatu zuten, eta Israelgo tanke eta frankotiratzaileek eraso egin zuten janari bila zebiltzan gazatar askoren aurka.

EMPren arabera, Gazako desnutrizioak gora egin du, 90.000 emakumek eta haurrek premiazko tratamendua behar baitute, eta "ia hirutik batek egunak daramatza jan gabe". Mila pertsona baino gehiago hil dituzte gosearen ilaretan.

Ekialde Hurbileko Palestinako Errefuxiatuentzako Nazio Batuen Herri Lan eta Sorospen Erakundeak  adierazi duenez, "Gazako biztanle guztientzako elikagai nahikoak ditugu biltegietan hiru hilabete baino gehiagoz gordeta, baita Egiptoko El Arishen ere [Rafahtik 47 kilometrora], sartzeko zain".

Goseak eragindako arazoei egarriak sortutakoak gehitu zaizkie. UNRWAren arabera, erregai falta (Gazarako sarbidea Israelek blokeatzen du) putzuak ponpatzea eragozten ari da, ezinbestekoa baita edateko eta saneamenduarentzat. Horri gehitu behar zaio uztailaren 21ean Gaza hiriko Remal auzoan ura gatzgabetzeko planta bati egindako erasoa.