Milei neba-arrebak ustelkeria trama batean inplikatuak egon daitezke. Presidentetza idazkari orokorra Karina Milei –Javier Milei presidentearen arreba– ustelkeria trama baten parte dela azaldu du Diego Spagnuolok filtraturiko audio batzuetan. Karina Milei, eta haren eskuineko eskua Eduardo "Lule" Menem aipatzen ditu, eroskeria trama baten buru gisa.

Ustezko eroskeria Desgaitasun Agentzia Nazionalerako sendagaien erosketa publikoan egiten zutela jarri dute agerian audioek; Spagnuolok zehaztu du laborategi hornitzaileek ehuneko gehigarri bat ordaindu behar ziotela Suizo Argentina S.A. enpresa farmazeutikoari. Saldutakoaren %3 eta %4 arteko gehigarria ordaindu behar zuten laborategiek, eta bertatik, enpresak, funtzionario batzuek eta gobernuko kargu batzuek dirua jasotzen zuten. Paradoxikoki Mileiren gobernuak "motozerra" ospetsua aplikatu zion agentzia horri, pertsona zaurgarrienen pentsioei hain zuzen ere.

Audioak pasa den astean filtratu zituzten "Carnaval" izeneko streaming kanal batetik, eta horietako batean Javier Milei presidenteak ustelkeria tramaren berri zuela azaldu du Spagnuolok. Hori horrela, salaketa judiziala jarri diete Milei neba-arrebei, eta hamasei miaketa baino gehiago agindu ditu epaileak, haien artean, Spagnuolori egindakoan, bi mugikor lortu dituzte, giltzarri izan daitezkeenak, Karina Mileirekin bidalitako mezu guztiak baitaude.

Suizo Argentina enpresako buruak Emmanuel Kovalivker eta bere anaia Jonathan Kovalivker ikertzeko agindua ere eman du epaileak, Emmanuel Poliziarengandik ihes egiten saiatu da, eta kotxean 266.000 dolar eta 7 milioi peso atzeman dizkiote. Jonathan ez dute aurkitu, hala ere, bere etxean hiru segurtasun kutxa zeuden, horietako bat irekita eta lurrean gomak botata zeuden, Poliziak uste du dirua bertatik presaka atera duela.

Milei eta bere kideak ekitaldi batetik ebakuatu dituzte

Eroskeria trama ezagutarazi dute "$LIBRA" kriptomonetaren eskandaluaren testuinguruan. Urrian legegintza-hauteskundeak ospatuko dituzte Argentinan, horien bidez, diputatuen ganberako 257 eserlekuetatik 127 berrituko dituzte.

Horretarako kanpaina egiten ari da Mileiren gobernua, eta Lomas de Zamora hirian ekitaldia egiten ari zirenean gobernuaren iruzur eta ustelkeria kasuen ondorioak jasan dituzte. Ekitalditik ebakuatu behar izan dituzte Milei eta bere kideak –haien artean Karina Milei– herritarrak objektuak jaurtitzen hasi direlako.

Milei presidentetzara ustelkeriaren kontrako diskurtsoarekin ailegatu zen, orain, bera inguratzen duten ustelkeria kasuek zalantzan jarri dituzte hasierako hitz horiek.