Rhizomáticak teknologia berriak hardware eta software irekian zabaltzen ditu, komunitate indigena horietara telekomunikazio sarbidea posible eginez. Villa Talea de Castro zonaldean sistema komunitarioa jarrita dute jada, eta sistema komunitateak berak finantzatu eta kudeatzen du.

Irrati komunitarioa ere badute. Aipatu elkartearen proiektua da, eta inguru horietako jendeak komunikatzeko erabiltzen du. “Bertakoek oinez, autobusez edo kamioiez gertueneko herrira atera behar izaten dute telefonoz deitzeko”, azaltzen du sistema komunitarioaren proiektuan parte hartzen ari den jatorri Mazateca-ko Melquiades Rosas Blancok.

Konpainia handiak interesatu dira

Rhizomáticak aditzera eman duenez, telekomunikazio enpresa handiak hasiak dira inguruak aztertzen. Lehendik herritarrek eskatuta zuten behin baino gehiagotan telefonia zerbitzua, baina sistema berriaren oihartzuna ailegatu arte baztertuta utzi dituzte Oaxacako indigenak. Konpetentzia usaindu dutenean ordea, mugimenduak hasi direla azaldu dute. Esan dutenez, izanak dira zonaldeko zenbait etxetan telefonoak eskaintzen sare komunitarioa aprobetxatuz, eta komunitate gehiago proiektuaren parte diren neurrian konpainia handiek ere muturra gehiago sartuko dutela diote.