EHUko errektore kargurako aukeratu dute bigarrenez Iñaki Goirizelaia botoen %55arekin. Parte-hartze baxua izan da errektoretzarako hauteskundeen ezaugarri nagusia, bereziki ikasleen artean: 4.566 lagunek bozkatu dute eta 51.643 pertsonak zeukaten horretarako eskubidea. Goirizelaiak Euskadi Irratiari adierazi dionez, “azterketa sakona” egingo dute ikasleen portaera horren inguruan.
“Errektoreak egiten duen lana urrun ikusten dute eta beharbada hor guk landu behar dugu” adierazi du Albiste Faktoria saioan. "Bagenekien parte-hartzea txikia izango zela ikasleen artean”, gaineratu du eta aurreko hauteskundeetan ere ikasle gutxik bozkatu dutela gogorarazi du, oraingoan “nabarmenagoa” izan den arren. Horri erremedioa bilatzeko ikasleen artean parte-hartze plana abian jarri nahi dute, Goirizelaiak dioenez.
Ikasleak ziren atzoko bozketara deitutako gehienak, 44.241 lagun. Haien artean nabaritu da parte-hartze baxuena. EHUko hauteskunde sistemaren eraginez, ikasleek azken emaitzaren %22,08 baino ez dute ordezkatzen. Ikasle Abertzaleak sindikatuak abstentziorako deia egin zuen, “unibertsitate euskaldun, parekide, herritar, demokratiko eta askatzailea” defendatzearekin batera.
Werten neurrien eragina "murriztu"
Jose Ignacio Wert Espainiako Hezkuntza ministroak atzo plazaratutako erreforma proposamenaz ere galdetu diote Goirizelaiari. “Gure eskuetan dagoen guztia egingo dugu neurri horiek duten eragina murrizteko” adierazi du EHUko errektoeak.