Ariketa soziala aurreko hiru edizioetako berbera da. Norbanakoek belarriprest edo ahobizi rola aukeratu dute eta horiei dagozkien txapak paparrean jarriko dituzte. Ahobiziak euskaraz ulertzen duen ororekin egingo du euskaraz, nahiz eta eta parekoak euskara ez den beste hizkuntza batean erantzun. Beti egingo du lehen hitza euskaraz, parekoari adierazteko euskaraz egin nahi duela eta euskaraz jarraituko du jakin arte solaskidearekin euskaraz egiteko modua izango duen ala ez, alegia, euskara ulertzeko gai den ala ez jakin arte. Antolatzaileek (Taupa mugimendua eta EAEko, Nafarroako eta Ipar Euskal Herriko erakunde publikoak) askotan azpimarratu dute: rola ez da aukeratzen euskara-gaitasunaren arabera, baizik eta hamaika eguneko ariketan hartu nahi den jarreraren arabera. Beraz, ahobiziak lehen hitza euskaraz egingo du beti eta prest egongo da bi hizkuntzetan eman daitezkeen elkarrizketak egiteko. Ahobiziaren helburua maiatzaren 15etik 25era euskara orain arte baino gehiago erabiltzea da. Belarriprest rolak adierazten du norbanakoa euskara entzuteko prest dagoela eta gonbita egiten die gainerakoei berari euskaraz egin diezaioten. Horrek ez du esan nahi belarriprestak euskaraz egingo ez duenik, baina ez du horretarako konpromisorik hartzen.

Hasiera ekitaldiak arratsaldean

Ondoren duzue maiatzaren 15ean, ostegunez, hasiera ekitaldiak egingo dituzten hiri eta herrien zerrenda:

● Bilbo, 18:00etan Indautxu plazan
● Gasteiz, 18:00etan Foru plazan
● Getxo, 17:30ean Gure Zirkuko plazan, Portu Zaharra
● Iruñea, 19:15ean O plazan
● Donostia, 19:00etan Blas de Otero plazan
● Baiona, 18:00etan Patxa plazan
● Andoain, 19:00etan Zumea plazan
● Irun, 19:00etan Zabaltza Plazan
● Orendain, 18:00etan herriko plazan
● Astigarraga, 18:00etan emakume plazan
● Ordizia, 18:00etan plaza nagusian
● Azpeitia, 19:00etan herriko plazan
● Usurbil, 18:30ean kalejira udaletxetik
● Mendaro, 19:00etan udaletxean
● Lemoiz, arratsaldean Armintzako portuan
● Dima, 19:00etan plazan
● Barakaldo, 18:30ean herriko plazan
● Ortuella, 18:00etan, Otxartaga plazan
● Portugalete, 19:00etan, San Roke plaza-Solar Plaza

Horiez gain, beste hainbat herritan ere egongo dira ekitaldiak, hala nola Zizurren, Beskoitzen, Larresoron, Hendaian eta Donapaleun.

Lehenengo aldiz Hikaldia egingo da

Gipuzkoako 59 herrik, Bizkaiko hamabik eta Nafarroako beste hainbestek eman dute izena Hikaldian. Euskaraldiaren webgunean herrien zerrenda osoa dago. Bi motako herriek hartuko dute parte ekimenean. Batetik, hainbat herritan hika egunerokoan erabiltzen dute bizilagunek, baina batez ere toka darabilte, hau da, gizonezkoei egiten zaien forma. Noka, emakumeei egiten zaien modua, nabarmen gutxiago erabiltzen da eta ia galdu da. Beraz, bereziki noka bultzatuko dute herri horietan. Bestetik, hitanoak ia tokirik ez duen herriek ere eman dute izena. Horietan noka eta toka, biak neurri berean bultzatuko dira.

Zein da ariketa?

Ahobizi edo belarriprest rola aukeratzeaz gain, Hika ekimenean parte hartu nahi badute, H hizkia daraman eranskailua jarriko diote ahobizi edo belarriprest txapari. H eranskailua eramateak esan nahi du: “Nahi baduzu nirekin hika egin dezakezu”. Ez da beharrezkoa hika hitz egiten jakitea, entzuteko jarrera adierazten du.

Zergatik Hika ekimena?

ZirHika antolatzaileak adierazi du euskarak erregistro informalen beharra ere badaukala, “kaleko erabilera indartzeko erdaretara jo gabe”. Hitanoak funtzio hori bete dezakeela uste dute, hizkera informala, lagunartekoa, hurbila eta freskoa delako.

Ekimenaren bultzatzailea ZirHika taldea da, Euskaraldiaren antolatzaile Tauparekin batera. ZirHika 2024ko apirilean sortu zen hitanoa biziberritzeko, eta bereziki noka bultzatzeko. Azken urteetan, Euskal Herriko 50etik gora herrik antolatu dituzte hitanoa bultzatzeko (eta batez ere noka) ekimenak, horien artean Euskal Herriko I. Hikadromoa eta Euskal Herriko I. Hika Topaketak. Azken horretan 80 hika eragile bildu ziren.