Bereziki Madril inguruan ari da lanean aipatu kolektiboak biltzen dituen Desobedientzia Zibilaren aldeko Plataforma. "Identifikazio sarri arbitrario, bidegabe eta arrazistei" aurre egin behar zaiela dio, poliziaren helburua gizarte mugimendua desaktibatzea delako.

"Hiritarren Segurtasunerako 1/1992 Lege Organikoa (Corcuera legea) indarrean jarri zenetik, Estatuko Segurtasun Indarrek baimena dute, teorian, edozein pertsona susmagarri identifikatzeko", dio plataformak bere webgunean. "Bada, eskumen hori modu arbitrarioan erabiltzen dute. Ohikoa da ikustea agenteek karneta nola eskatzen duten azal kolorearen edo itxuraren arabera, baita mugimendu sozio-politikoetan parte hartzen duten lagunei ere".

Gizarte eragileek salatu dutenez, Gobernuaren Delegaritzak 246.000 euro poltsikoratu ditu 2011ko maiatzaren 15etik, kargua Cristina Cifuentesek hartu zuenetik, alegia. Haien hitzetan, paradoxarik handiena da identifikatzen dituzten herritar asko ez doazela behar bezala dokumentaturik. "Polizien inpunitatea eta herritarren babesgabetasuna handitzen ditu horrek", diote.

Helburuetako bat herritarrek kolektiboki identifikatzeari uko egin diezaioten lortzea da. "Legalitatearen eta legitimitatearen arteko gatazka azaleratuko luke horrek", esan du Desobedientzia Zibilaren aldeko Plataformak. "Ekintza horrek ez du ondorio legalik", dio polizien aurrean nola jokatu behar den azaltzen duen esku-orriak, identifikatu ahal izateko komisaldegira eraman zaitzaketela zehazten duen arren.

Espainiako Barne Ministerioari eta Gobernuaren Madrilgo Delegaritzari eskatu diete identifikazio arbitrarioak behin betiko amaitzeko.