Ibarbengoako sabotajea gaitzetsi dute erakundeek, eta Tosu Betirakok legitimatu

  • Hainbat ezezagunek Getxoko Ibarbengoako metro-parkingaren lanei eraso egin zieten joan den bariku eta zapatu arteko gauean, Ertzaintzaren arabera. Eusko Jaurlaritzak, Euskal Trenbide Sareak eta Imanol Landa Getxoko alkateak gaitzetsi dute ekintza hori. Tosu Betirakok "ez du zerikusirik" horregaz, baina babestu du ekimena. Getxoko Auzokideok elkarteak haizeari leporatu dio gertatutakoa.

Hiruka .eus
2018ko martxoaren 12a
Eusko Jaurlaritzaren Segurtasun Sailaren arabera, ezezagunek 40.000 euro baino gehiagoko kalteak egin dituzte Ibarbengoako obrak ixten zuen metalezko hesian. (Argazkia: Tosu Betirako)

Eusko Jaurlaritzaren Segurtasun Sailaren arabera, ezezagunek 40.000 euro baino gehiagoko kalteak egin dituzte Ibarbengoako obrak ixten zuen metalezko hesian. Hala, euskal exekutiboak bere arbuiorik "irmoena" agertu eta salaketa ipini du Ertzaintzaren aurrean. Zehaztu dutenez, eraso-egileek 30 zutoin zerraz moztu eta galvanizazio-altzairuko piezak eusten zituzten torlojuak kendu zituzten, xafla metalikoak bertan behera botatzeko. Exekutiboak azpimarratu du "kalteak nabarmenak" izan direla eta "modu planifikatuan egindakoak".

Euskal Trenbide Sareak azaldu du obrak hasi zirenetik asko izan direla sabotaje-saiakerak. Jaurlaritzaren ustean, "azpiegitura berrietako obrei indarkeriaz eraso egitea iraganeko eskema da". Hala, deitoratu dute "XXI mendean, proiektu baten aurkako pertsonek euren desadostasuna agertzea eraso fisikoen bidez". Modu berean, Eusko Jaurlaritzak gogorarazi du Ibarbengoako disuasio-parkinga "gizarte osoaren zerbitzurako" egingo den lan publikoa dela. Azkenik, Jaurlaritzak berretsi du proiektua egin egingo duela eta horretarako "berme denak eta lege- eta administrazio-eskakizun guztiak" betetzen dituela proiektuak.

Alkateak gaitzetsi eta Tosu Betirakok ulertzen du

Imanol Landa Getxoko alkateak gaitzetsi du sabotaje-ekintza: "eraso bortitz horrek ez du inolako justifikaziorik ezta legitimaterik ere". Landak deitoratu du "oraindino, gaur egun, gure udalerrian izatea bortxakeria fisikoaren antzinako estrategiaren alde egiten duenik". Modu berean, alkateak berretsi du erabateko babesa emango diola Eusko Jaurlaritzari, Ibarbengoako parkinga eraiki dezan eta sabotajearen egileen aurka aurkeztutako salaketan.

Bere aldetik, obren aurka dagoen Tosu Betirako kolektiboak adierazi du ez duela zerikusirik izan sabotaje-ekintzagaz. Dena den, "ekintza hori burutu dutenak anonimotasunean mantendu beharko direnez eta beraz ezingo dutenez ekintza horren legitimitatea babestu", Tosu Betirakok azaldu du zer dela eta uste dute ekintza legitimoa izan dela: "Lehenik eta behin parkinga inposizioa dela aipatu gura dugu. Gure ustez oso adierazgarria da zelan Eusko Jaurlaritzak eta Imanol Landak ez ikusiarena egin dizkiete parkingaren aurka egondako mobilizazioei (mila pertsonako hiru manifestazio, besteak beste). Azken horrek Getxoko Udalbatzaren iritziari ere entzungor egin dio, izan ere zinegotzien gehiengoa parkingaren aurka agertu da publikoki. Horregatik, ulergarria iruditzen zaigu zenbait auzokidek edo herritarrek beste ekintza mota batzuk egitea euren ahotza entzun dadin".

Tosu Betirakoren ustean, "segur aski, hainbat kolektibok eskatu bezala parkingaren inguruko herri kontsulta bat egin izan balitz", aurreko gauekoa "ez litzateke gertatu izango".

Gogorarazi dutenez, "Tosuko ingurua akuifero ugarikoa izan arren obrarako Ingurumen Eragineko Txostenik egin ez izana bere aipatu gura dugu. Hau oso larria da, gehienbat parkingak lurrazpiko solairu bi izateak lur azpiko urei kalte handia eragingo lieke eta. Horregatik, ulergarria iruditzen zaigu zenbait herritarrek heziak kendu izana".

Katua, balego errua

Azkenik, Getxoko Auzokideok auzo-elkarteak Félix ekaitzari leporatu dio Ibarbengoako lur-azpiko parkingaren itxiera bota izana, zati handi batean. Azaldu dutenez, Félixek "espero baino indartsuago jo du non eta Andra Mari auzoan", 100 kilometro orduko haize-ufadakaz. Obren zaindarien berbetan ipini dituzte honako deklarazio bitxi hauek: "egia da jendeak ez duela parking hau gura. Orain, badirudi, elementu klimatologikoek ezta ere. Ez dakit zer gertatuko den".

Modu berean, D.G.I. Tosuko auzokideen lekukotasuna zabaldu du Getxoko Auzokideok plataformak. Bere ustean, ez da lehenengo aldia Tosun hego-haizeek bat egiten dutela iparreko goiko korronteakaz, inguruan jaisteko. Gainera, kritika egin diote Geocisa enpresak erabilitako materialen kalitateari: "hesiaren eraisteak egiaztatu du kontratatutako enpresak materialik bigunenak eta eskasenak hautatu dituela, kostuak optimizatzeko". Gogorarazi dutenez, parkingaren lehiaketan Geocisak 2,5 milioi euroan merkatu zuen bere eskaintza. Bestalde, iragarri dute auzotarrek Bob Dylanen "Blowin in the wind" abestia aukeratu dutela datozen jaietako kanta izan dadin. Elkarteak nabarmendu du auzokide gehienak parkingaren aurka daudela eta "ustelkeriaren parkinga" legez batailatu dutela.

Albiste hau Hirukak argitaratu du eta CC-by-sa lizentziari esker ekarri dugu ARGIAra

Kanal honetan artxibatua: Tosuko borroka

Tosuko borroka kanaletik interesatuko zaizu...
2018-06-06 | Topatu.eus
Tosuko landagunean "jarduera ekonomikoen parkea" eraiki nahi dutela salatu dute herritarrek

Tosu Betirako plataformak, Udalaren erabakia kritikatu du. Izan ere, Getxoko Andra Mari auzoko landagunean parkinga ez ezik, “jarduera ekonomikoen parkea” egingo dutela azaldu dute. Erabakiaren aurrean, ordea, herritarrei mobilizatzeko dei egin diete plataformako kideek.


2018-02-22 | Hiruka .eus
Tosu landaren aldeko borrokaren "kriminalizazio saiakera" salatu dute

Ibarbengoako parkinga eraikitzeko obrak oztopatzeko "indarkeria" delitua egotzita auzipetutako hiru lagunen kasua artxibatu du epaileak, Tosu Betirako taldeak jakinarazi duenez.


2018-02-20 | Axier Lopez
Aman Komunak
"Ez gara jabetzen herri mugimenduak Euskal Herrian duen indarraz"

Ibiltzen hasi berria da, baina esperientzia eta bizipen asko biltzen du Aman Komunak sareak, herri mugimenduko hainbat taldek eta kidek osatzen dutelako. Joan-etorriko izaera izan nahi du: bakoitzaren kolektibotik sare orokor bat aberastu, sareak tokian tokiko eguneroko lana bizitu dezan. Sorreratik ari dira parte hartzen Maddi Sarasua Errekaleorren bizi den itsasuarra eta Urruñako Hartzea Lopez.


2018-01-30 | Hiruka .eus
Sententziaren zain gelditu dira Ibarbengoako obrak gelditzea saiatzeagatik auzipetutako hiru lagunak

Gaur goizean Getxoko epaitegietan epaitu dituzten hiru ekintzaileek argi dute, "balizko kalteengatik baino, protestak zigortu gura izan dituzte epaiketa honegaz". Izan ere, azaldu dutenez, akusazioak zigor-eskaera bertan behera uzteko proposamena egin du epaiketan, ekintzaileek obra-eremura sartzeko konpromisoa hartuko balute. Halere, horri uko egin eta sententziaren zain gelditu dira hiru gazteak.


2018-01-25 | Hiruka .eus
Hiru lagunek deklaratu beharko dute ostiralean Tosuko obrak gelditzen saiatzeagatik

Urtarrilaren 26an, barikua, hiru lagunek deklaratu beharko dute Getxoko epaitegian, Ibarbengoako parkinga eraikitzeko obrak oztopatzeko "indarkeria" delitua egotzita.


2017-12-19 | Hiruka .eus
Obrek botatako zuhaitz bat utzi dute Algortako Batzokian, "Tosuko txikizioa" salatzeko

Tosu Betirako plataformak deituta, Ibarbengoako aparkalekua eraiki gura duten landarainoko martxa egin zuten zapatuan, hilaren 16an, 200 lagun inguruk. Tosu landa ertzainez inguratuta zegoen; hala ere, lanen hasiera salatu zuten bertan herritarrek. Ondoren, hondeamakinek obren hasieran bota zuten zuhaitz bat hartu eta Algortako Batzokira eraman zuten EAJren jarrera salatzeko, "txikizioak erantzule zuzen bat" daukalakoan.


2017-12-14 | Unai Brea
Larunbatean Tosura egingo den martxara joateko dei egin dute

Larunbatean Getxoko Tosu landara joango den manifestazioan parte hartzeko deia egin du Tosu Betirako asanbladak. Urriaren 21ean ingurua berriz okupatu ostean eraikitako etxolaren alboan egun dute agerraldia, buzo zuriz jantzita eta aurpegiak maskaratxoz estalita; abenduaren 16an egingo den martxara doazenei ere halako bana emango diete, mobilizazioa "ikusgarriagoa izateko eta Andra Mariren suntsipenak ekarriko duen kutsadura salatzeko".     


2017-12-14 | Hiruka .eus
Tosuko landan Jaurlaritzaren eta Viviendas de Vizcayaren arteko akordioa zein den galdetu du EH Bilduk

Getxoko Tosu landaren inguruan galdegin dio Mikel Otero Gabirondo EH Bilduko legebiltzarkideak Eusko Jaurlaritzari. Ekonomia Garapena eta Azpiegituretako Sailburuari egin dio errekerimendua, Jaurlaritzaren eta Viviendas de Vizcaya S.A. enpresaren arteko akordioa zein izan den jakiteko. Izan ere, enpresa horrek Tosu landan duen partzela osora zabaldu dute aparkalekua eraikitzeko obra eremua. Hala, akordioaren baldintzak zeintzuk izan diren ere galdetu[+]


2017-11-28 | Andoni Mikelarena
Pertsona bat kateatu da Getxoko Tosu landan, lanak eragozteko

Hesia eraikitzeko lanetan ari dira hondeamakinak. Herritar bat lurrean etzan eta kateatu egin da. Herritarrei bertara joateko eskatu diete asanbladako kideek. Astelehenean sartu ziren berriz hondeamakinak Tosun.


2017-11-13 | Andoni Mikelarena
"Tosuko obra atzeratzen dugun egun bakoitzeko, gertuago dago proiektua geratzeko aukera"

Larunbatean Ibarbengoako parkingaren aurkako manifestazioa egin zuten Getxon. “Pozik” agertu dira antolatzaileak herritarren erantzunarekin.


Azkenak
EGILEA
Eguneraketa berriak daude