IA: "Ikasle iraultzaileen ahalduntze ariketa bat da hau"

Ikasle Abertzaleek plazaratutako agirian diotenez, “hilabete askotan, IAk borroka egin du Arizmendik gaur egun daukan greba araudi onartezina aldatu dezan. Araudi hori baliatuta, grebak sistematikoki boikotatu izan dira; izan ere, %25eko desbinkulazioa lortuz gero, greba ez da irteten, nahiz eta gainerako %75ak aldeko botoa eman. Egoera hori probokatzeko, atzeratu ezin omen diren azterketak jartzen dituzte greba egunetan, xantai gisa”. IAren hitzetan, "hau ez da ikasle batzuen kapritxoa. Hau ikasle iraultzaileen ahalduntze ariketa bat da. Ez dugu onartzen grebarako eskubide errealik ez izatea, eta ez dugu negoziatuko justiziaz dagokigun ezer".

Manifestazioaren irudiak:

[MANIFESTAZIOA]@Arizmendi-ko @IAbertzaleak deituta manifestazioa egin dute #Arrasate-ko kaleetan. pic.twitter.com/naWngDIMrY

— Arrasate Goiena (@arrasategoiena) 2018(e)ko otsailak 22

Hasi da Ikasle Abertzaleek deituriko mobilizazioa, greba eskubidearen alde (arg: @IAbertzaleak) pic.twitter.com/rqphvIyqhJ

— Topatu (@topatu_eus) 2018(e)ko otsailak 22

Zuzendaritza: “Ez diogu ezeri ateak ixten, dena dago aztergai”

Arizmendiko zuzendaritzak azaldu digu Batxilergoan betidanik izan dela grebarako eskubidea eta inoiz ez dela ukatu. Iaz lehenengo aldiz aldarrikatu zuten DBH 4koentzako greba eskubidea eta “araudia zaharkituta zegoela ikusi genuen, bai ikasleek, bai guk. Araudia berrikusteko konpromiso firmea daukagu –diote zuzendaritzatik– eta dagoeneko hasi gara ikasgeletako ikasle ordezkariekin bilerak egiten, gaia jorratzeko eta puntuz puntu hausnarketa egiteko, ez diogu ezeri ateak ixten, dena dago aztergai”.

Hainbat ikasle ordezkarik ez du grebarekin bat egin

Arizmendi ikastolako hamazazpi ikasle ordezkarik argitu dute ez dutela bat egiten grebarekin. Zera diote plazaratutako oharraren lehenbiziko puntuan: "Greba araudia aldatzeko prozesuaren hastapenak ez ziren aurreko ikasturtean eman, soilik proposamenak izan ziren. Hori dela eta, aurtengo ikasturte hasieran, urtean zehar landuko genuen plangintza zehaztu zen eta orain dela hiru aste inguru hasi ginen prozesua martxan jartzen. Gainera, argitu beharra dago, ez dela izan ikasle abertzaleek sortutako presioagatik, ikastolan aurreikusita baitzegoen araudia aldatzea.

Ikastolen Elkartearen babesa ikastetxeari

Ikastolen Elkarteak, bestalde, babesa adierazi dio Arizmendiri, ohar baten bidez (PDF): "Arizmendi ikastolak Derrigorrezko Bigarren Hezkuntzako ikasleekin greba eskubidea bermatzeko araudia berrikusten ari den unean, Ikasle Abertzaleak taldeak deituriko mobilizazioak harridura eta kezka sorrarazi dizkigu".