Espainiako Estatuak Baionan duen kontsuletxean hogeita hamar bat euskal iheslari erregistratu dira, "terrorismoaren aurkako borrokako" iturriak aipatuz Europa Press agentziak jakinarazi duenez.
Iheslariok jada ez dute euren aurkako kausarik. Aipatu iturrien arabera, gehienak "ETAren kolaboratzaileak" izan ziren 1980ko hamarkadan. Haien artean ez omen dago etakide "bereziki aipagarririk".
Azken hilabeteetan prozesu politikoan parte hartzeko eta aurrerapausoak emateko borondatea agertu dute iheslariek, "erbestaldiak behin betiko desagerrarazteko". Ingurumari horretan kokatzen da Baionako kontsuletxean erregistratu izana.
Europa Pressek nabarmendu duenez, Espainiako Gobernuak negoziatzeko asmorik ez duen arren, Jorge Fernandez Diaz Barne ministroak adierazi du haien aurkako kausarik ez duten herritarrek euren pasaporteak eskatu ahal ditzaketela, militantzia urteengatik erantzun behar izan gabe.