Hipotekak dakartzan gastu garrantzitsuenak bezeroek ordaindu beharko dituzte: Ondare Eskualdeketen Gaineko Zerga (ITP gaztelaniazko siglak) eta Ekintza Juridiko eta Dokumentatuen Gaineko Zerga (AJD gaztelaniazko siglak).
2015eko epai batean, Espainiako Auzitegi Gorenak gehiegizkotzat jo zuen hipotekaren gastu guztiak bezeroek ordaintzea, eta baldintza hori zuten kontratuak baliogabetu zituen. Epaile batzuek ebazpen hori baliatu dute gastu guztiak bankuei ordainarazteko edo bezero eta bankuen artean partekatzeko.
Asteazkenetik aurrera, Gorenaren erabakiz, zergak kontsumitzaileek ordaindu beharko dituzte. Bankuak eta bezeroak erdibana ordainduko duten gastu bakarra notarioen agiriek ordaintzen duten tasa izango da.
ADICAE kontsumorako elkarteak esan du Espainiako Auzitegi Gorenak “Kontsumitzaile eta Erabiltzaileen Legea” eta Europako jurisprudentzia urratu dituela.
Facua elkarteak ere ebazpena deitoratu du, eta eztabaida Europar Batasuneko Justizia Auzitegira iristea galdegin du.