2012an hasitako obra lanen bigarren fasea abiatu dute, eta jarritako epearen arabera hiru urte eta bost hilabeteren buruan lanek amaituta egon beharko lukete.
ETS Euskal Trenbide Sarea elkarteak adierazitakoaren arabera, adjudikatu dituzte Hernani eta Astigarraga arteko AHTren obren lanak. Bi udalerrien arteko tarteko lanak orain zazpi urte abiatu ziren, eta elkarteak zehaztu ez dituen proiektuaren gaineko aldaketei egotzi die atzerapena. Lanen %40 eginda daude, eta geratzen dena bukatzeko 41 asteko epea ezarri dute. Lanok 47,3 milioi euroko kostua izango dute. ETSren arabera, obrak 2019ko azken lau hilabetekoan martxan egongo dira.
Hernani eta Astigarraga artean den Ergobiako igarobidearen obra lanak ere esleitu ditu ETSk, Baizola eraikuntza enpresari kasu honetan, 4,5 milioi euroren truke.
Gipuzkoako AHTren ibilbideko hamazazpi ibilbide-tarteetatik hamabitan obrak burututa daude dagoeneko. Datozen hilebateetan, Hernialde-Zizurkil, Zizurkil-Andoain, Urnieta-Hernani eta Antzuola-Ezkio mendebaldeko tarteetan ere lanak amaitutzat emango direla aurreikusten da. Hala bada, Hernani-Astigarraga arteko lanak behin burututa, 2022rako Gipuzkoako AHTren ibilbidea prest izatea aurreikusten du Eusko Jaurlaritzak.
AHTren zulo beltza
Abiadura Handiko Trenaren azpiegitura lanak martxan jarri zirenetik, gehiegikeria eta irregulartasunez betetako obrei eman zaie bide. AHTren obretan gertatzen denaz idatzi zuen ARGIAko kazetari Urko Apaolazak ZULOAN: bidaia bat AHT eta lan-esplotazioan barrena liburuan. Bere hitzetan, “Euskal Herrian inoiz egin den garraio azpiegitura handiena da AHT. Ingurumenean edo sozialki izan dezakeen eraginaz gain, bertan ari diren langileentzat ere zulo iluna da”.