Sorkuntza bekak euskarazko kultura proiektuak saritzen ditu Azpeitian. Lanok euskara hutsean egingo direla leporatuta jarri du helegitea Urquijok.

“Kanpo eraso larritzat” jo du gertatutakoa Ainara Larrañaga kultura batzarkideak. “Deialdia egin zen momentutik, Euskal Autonomia Erkidegoan Espainiako delegatu den Carlos Urquijok gertutik jarraitu du beka hauen ibilbidea. Argitaratu bezain pronto, informazioa helarazteko eskatu zigun”, azaldu du.

Josu Labaka kultura batzarkideak gaineratu du “euskal kultura eta euskal sortzaileen aldeko apustua” egiten jarraituko dutela.

Udal Legea onartuta, baina zirrikituak ditu

Apirilean onartutako Udal Legeari esker euskara hutsean errazago aritzeko aukera dute udalek. Horrek orain arteko derrigorrezko elebitasuna gainditzea dakar. Hala ere, baditu mugak legeak, eta Urquijok diru-laguntzei buruz dagoen hutsunea aintzat hartu du helegitea jartzeko. Urquijok 1982ko Euskararen Legea –elebitasuna du oinarri– baliatu du beste behin.