Datorren urteko martxoaren 27an Hapoel eta apirilaren 7an Maccabi talde sionistak etorriko dira Buesa Arenara Baskoniaren aurkako partidak jokatzera. Bi taldeek lotura zuzena dute Israelgo Estatu eta proiektu sionistarekin. Palestinarekin Elkartasuna plataformatik partida hauen aurkako kanpainak abiatuko dituztela esan dute Suelta la Ollan egindako elkarrizketan.
Pasa den otsailaren 7an jokatu zuen azkenekoz Maccabi taldeak Gasteizen. Palestinar herriaren kontrako genozidioa gogortzen ari zen unean, gasteiztarrek, partida honen aurrean altxatu eta, manifestazio indartsu batekin erantzun zuten. Palestinarekin Elkartasuna plataformako kideek partiduak "Gazaren aurkako genozidioa zuritzeko" balio zuela argudiatu zuen. Era berean, "Euskal Herriak Israelgo Estatuarekin dauzkan harremanak apurtu behar direla" gehitu zuten, baita "kulturalak edo kirol arlokoak ere".
Urriaren 22an Arabako Batzar Nagusia osatzen duten talde politiko gehienek Gazako sarraskiaren aurkako gaitzespena adierazi zuten. Adierazpen horietan Israelgo kirol taldeak kanporatzeko eskaera egin zuten nahiz eta ez zen inolako erabaki ofizialik hartu. Ramiro Gonzalez Arabako ahaldun nagusiak azaldu zuen aldundiak ezin diela Israelgo taldeei Buesa Arenan jokatzea galarazi Baskoniari utzia dagoelako pabiloia. Baskonia klubak bere partetik esan du nazioarteko kirol erakundeen eta Espainiako Gobernuaren esku dagoela eta beraiek ere ezin dutela talde hauen etorrera ukatu.
Gauzak horrela, Hapoel eta Maccabi taldeek Gasteizen jokatuko dute 2026an inork ez badu partidak eragozteko ardura hartzen. Euroliga osatzen duten klubek, Israel eta Palestinaren arteko su-etena aitzakiatzat hartuz, talde israeldarrek partidak berriro ere Israelen jokatzen hastea erabaki dute. Palestinarekin Elkartasuna plataformatik esan dute "su-eten akordioa sinatu zen lehen unetik Israelek ez duela bere hitza bete" eta "AEBrekin eta Mendebaldeko agintaldiekin batera diseinatutako planak garbiketa etnikoa mantentzea duela helburu".
Asteazkenean Palestinarekin Elkartasuna plataformako kide den Esterrek Suelta la Olla saioan egindako elkarrizketa batean partida hauen aurkako kanpainak abiatuko dituztela esan du. Kirol ekitaldi hauen bitartez Israelgo Estatuak sportwashing-a egiten duela salatu izan dute plataformatik eta kirol jarduerak Israelgo Estatuaren jarrera normalizatzeko erabiltzen dituela.
Maccabi taldea Israelgo Estatuaren enbaxadore lanetan ibiltzen da eta proiektu sionistaren aldeko kanpaina aktiboa egiten du. Maccabiren eta Israelgo Estatuaren proiektu sionistaren arteko harremanetan sakontzeko irakurri Hala Bedin Koldo Alzolak idatzitako artikulua.
Hapoel Tel Aviv taldea ezker ideologiari lotua egon da Israelen, baina orain dela gutxi Ofer Yannay enpresari milioidunak erosi zuen. Yannay Israelgo Estatuarekin lerratzen da eta Palestinaren aurkako jarrerak adierazi ditu askotan.
