Aurrera jarraitzen du EAEko anbulantzien grebak. Azaroan eta abenduan hiru eguneko lanuzteak egin ondoren, hamabost eguneko greba egingo dute urtarrilaren 8tik 21era bitartean. ELA, LSB-USO, LAB, UGT, CCOO eta ESK sindikatuek deitu dute greba, eta aldarrikapen nagusiak dira lan baldintzak Osakidetzako langileenekin parekatzea eta eros-ahalmenari eutsiko dion soldata igoera.

Negoziazioak “erabat blokeatuta” daudela adierazi du ELA sindikatuak: “Patronalak sindikatuen aldarrikapenetatik guztiz urrun dagoen proposamena eskaini du, Larrialdietarako Garraio Sanitarioaren (LGS) kontratuan aurrekontuaren %30 gehiago jaso duen arren eta beste %24 gehiago premiazkoa ez denaren kontratuan (gaur egun prozesuan dagoena)”. Halaber, salatu du Osasun Sailak oraindik ez duela bilerarik deitu: “Aitzitik, Lan Sailarekin bilerak egin dira, baina oraingoz ez da aurrerapausorik eman”. Bestalde, LSB-USO sindikatuak gogoratu du hitzarmena “eguneratu gabe” dagoela 2021etik.

ELA sindikatuak positiboki baloratu du grebaren lehen eguna, eta adierazi du jarraipena %90ekoa izaten ari dela.

Manifestazioak

Kontzentrazioak antolatu dituzte urtarrilaren 8an Arabako Santiago Ospitalean, Bizkaiko Gurutzetako Ospitalean eta Gipuzkoako Donostia Ospitalean. 11:00etatik 12:00etara bilduko dira bertan.

Bilboren kasuan, urtarrilaren 8ko manifestazioaz gain, hiru gehiago deitu dituzte: urtarrilaren 12an, 15ean eta 18an. Gasteizen 15ean egingo dute.