Hala Bedi, 30 urte kolpez kolpe
Gasteizko Hala Bedi irratiak 30 urte bete ditu eta horren harira ekimen ugari antolatzen ari dira. Besteak beste, irratiaren ibilbidea laburbiltzen dituen “Hala Bedi, 30 urte kolpez kolpe” liburua, diskoa eta dokumentala argitaratu dituzte.
Gaur, azaroak 14 osteguna, estreinatuko da dokumentala Florida zinemetan arratsaldeko 20:00etan. Sarrerak Hala Bedi tabernan daude salgai eta liburua eta DVDa eskuratuko dute sarrera erosten dutenek.
Halabideo taldeak ekoiztutako ikus-entzunezkoak ordubete inguru irauten du; eta irratiaren ibilbidea eta egunerokotasuna fikzioarekin uztartuko ditu. Oscar Bañuelos kazetaria ibili da zuzendari lanetan eta Asier Ugarte arduratu da umorezko fikzio tarteez.
Bestalde, Fermin Muguruza, Jon Maia, Mariano Ferrer, Iñaki Ortiz de Villalba eta Txerra Bolinaga gisako aurpegi ezagunak arituko dira elkarrizketatzaile lanetan.
“Ahotsik ez zutenei ahotsa emateko” helburuarekin jaio zen Hala Bedi irratia 1983an. Eta ordutik 30 udaberri joan dira; urte horietan guztietan asko aldatu da jendartea, hiria, teknologia eta komunikazioa bera. Baina lan boluntarioari esker handituz eta haziz joan da proiektua eta gainerako hedabideen artean lekua egitea lortu du.
Ikasturtearen hasieran zibereraso bat jasan eta hainbat astez webgunea berreskuratzeko lanetan jardun ondoren, bueltan da Hala Bedi irratiaren web orria. Dagoeneko hasi dira ohiko edukia argitaratzen: Arabako aktualitate albisteak, magazinen edukiak, irratsaioen podcastak,... [+]
Hala Bedi Irratiak 40 urte bete dituela ospatu zuen abuztuaren 6an, lau hamarkada lehenago lehen irrati emisioa egin zuen egun berean.
Aurten, eguneroko Suelta la Olla, Hizpidea eta Arrosa sareak ekoitzitako Zebrabidea magazinez gain, 42 irratsaio propio izango dira entzungai Hala Bedi irratiaren uhinetan. Euskaraz 14 irratsaio egingo dira, 27 gaztelaniaz eta galizieraz bat.