Fernando Grande-Marlaska Espainiako Barne ministro berria polemika-iturri izan da izendatu zutenetik, epaile zenean tortura kasuak ikertu ez zituelako besteak beste. Gutxiago aipatu da hizkuntza gutxituekin duen jarrera, baina Galizian behintzat, zenbaitek gogoan dute.
Sermos Galiza hedabideak argitaratu duen albiste batek azaltzen duenez, 2008. urtean Marlaskak galiziera “dialekto” gisa deskribatu zuen.
Lau independentista galiziarren kontrako epaiketaren instrukzio-fasean izan zen. Nós-Unidade Popular alderdi ezkertiar iraultzaileko kideak auziperatu zituzten Espainiako erregearen argazki bat erretzeagatik.
Akusatuek epaiketan galizieraz deklaratu nahi zutela adierazi zuten eta eskari horri erantzunez probidentzia bat idatzi zuen Marlaskak. Dokumentu horretan, honakoa irakurtzen da: “Dialekto galiziarrarentzat interpretea jartzeko eskariari dagokionez, epaitegi honek arduratzen den enpresari dagoeneko eskatu dio”.
