“Ukaezina da Gorritiren animaliek asko sufritzen dutela”, uste du Askekintzak. Animalien askapenaren alde argazkilaritzan aritzen diren Tras los Muros kolektiboko ekintzaileekin elkarlanean lortutako irudietan animaliak nola bizi diren ikus daiteke: “Txekor, hegazti, txerri, txakur eta untxiak zikinkeriaz inguratuta daude. Txekor batek aurpegian hantura benetan kezkagarria du, 'borrokarako' oilarrak kaiola txiki eta zikinetan giltzapetuta daude eta zauriak dituzte buruan”.

“Askekintzak garbi utzi nahi du animalia hauek, edo beste edozein, gure dibertsiorako erabiltze hutsa injustua dela. Ondorioz, ez dira kondizio hobeak behar; animalien erabilpenarekin amaitu behar da errotik. Horrek, kasu honetan, festa eredua eraldatzea eskatzen du”. Askekintza elkarte animalistak Gorriti eta bere animaliak ikuskizuna salatu du prentsa ohar baten bidez.

Gorritik “hilabete oso gutxiko txekorrekin sokamuturrak antolatzen ditu, umeek harrapatu dezaten txerrikumeak zelaian askatu, oilarrak borrokan jarri eta umeak gainean ibil daitezen” pottokak erabiltzen dituela salatu dute animalistek. Praktika horiek arbuiatu, eta horrekin batera Gorritiren zerbitzuak kontratatzen dituzten jai batzordeak salatu dituzte.

Askenkintzaren iritziz, “presiopean” dago Gorriti, “talde eta norbanako askoren iritziz bere praktikak onartezinak direlako”. Elkarte animalistak ere bere egiten du kexa, eta zehaztu du “animalien erabilera oro” gaitzesten duela: “Animaliak interes propiodun norbanakoak” direla aldarrikatu du.

Hona publiko egin dituzten irudiak: