Gorka Fraile preso gaixoa askatzeko eskatu du Durangoko Udalak
Fraileren aldeko plataformak aurkeztutako mozioa EAJk, EH Bilduk eta Herriaren Eskubideak babestu dute. "Egoera urgentea" dela ohartarazi du Ane Ortuondo plataformako kideak, osoko bilkuraren amaieran.
Gorka Fraile preso durangarrari (ETAko kide izateagatik 18 urte daramatza kartzelan) minbizia atzeman zioten duela urtebete inguru, eta ebakuntza egin zioten horren ostean. Geroztik, ez diote bestelako frogarik egin, berak publikoki salatu duenez. Ortuondok egoera hori gogoratu du, eta ezer egin ezean Fraileren osasunak txarrera egin dezakeela azaldu du. "Horrelako kasuetan araudiak ahalbideratzen duen bezala, Gorkak minbiziari aurre egiteko daukan bide bakarra etxera ekartzea da". Plataformak Fraileren askatasuna eskatu du mozioan, giza eskubideak oinarri hartuta. Aldeko jarrera agertu duten alderdiei eskerrak eman dizkie Ortuondok.
Goiztidi Diazek (EAJ) aldeko jarrera arrazoitu du: "EAJ beti egon da giza eskubideen alde, pertsona guztientzat. Atzo, gaur eta bihar". Dani Maezturen (EH Bildu) ustez, "minbizia duen pertsona bat ez da kartzelan egon behar". Gainera, Espainiako kartzela politika salatu du. Durangoko presoen senideek, guztira, kartzeletan bisitatzeko astebururo 18.138 kilometro egin behar dituztela gogoratu du. ETAk jarduera armatua 2012an amaitu arren ere, "mendeku politika" ezartzen dela kritikatu du, eta preso gaixoen kasuan "pauso bat gogorragoa" dela. Julián Ríosek (Herriaren Eskubidea) "bakearen eta giza eskubideen aldeko konpromisoa" berretsi du.
PSE-EEren jarrera
PSE-EEk ez du mozioa babestu, eta alternatibo bat aurkeztu du. Legeari jarraiki, gaixorik dauden presoei baldintzapeko askatasuna ematearen alde agertu dira sozialistak, eta baita presoak gradualki hurbiltzearen alde ere. Baina, ETAri desarmea eta desagerpena exijitu dizkio, eta presoei mina onartzea ere bai. Pilar Ríos: "Kartzela politika aldatu behar da, baina presoek, eragindako kaltea onartu behar dute".
Fran Garatek (PP) adierazi du gaiaren eskumena espetxeetako instituzioena dela, eta horregatik, ez du mozio bat ere babestu. "Espainia zuzenbide estatua da. Eskubideak eta zigorrak daude. Preso gaixo larriek 3. gradua lor dezakete arrazoi humanitarioengatik".
Albiste hau Anbotok argitaratu du eta CC-by-sa lizentziari esker ekarri dugu ARGIAra
Euskal preso politikoa ostiralean hil zen minbizi baten ondorioz, 30 urteko espetxealdiaren ostean kaleratu eta 10 hilabetera. Troitiñoren kasua euskal presoei aplikatzen zaien salbuespen politikaren adierazle dela salatu dute bi elkarteek. Mobilizazioak antolatu dituzte... [+]
Eritasun "larri eta sendaezin" bat duela, baldintzapean atera da kalera otsailaren 5 goiz honetan. Orotara, 30 urtez gora pasa behar izan ditu kartzelan.
61 urteko preso lekeitiarrak maiatzaren 13an buruko isuria izan zuela argitaratu du Etxeratek. Orain Puerto-I kartzelako (Cadiz, Andaluzia) erizaindegian dagoela eta asteburuan familiaren bisita izan duela gehitu du.
Dispertsio politika bukatzeko eta larriki gaixorik dauden presoak askatzeko eskatu diete Espainiako Estatuko eta Europako Parlamentuko presidenteei.
Sareko kideek presoen egoera aldatuko den "itxaropena" erakutsi dute: "Hala behar luke, behinik behin. Orain da unea; izan ere, orain ez bada, noiz?"