'Gora Gasteiz: izan kolore' dokumentala aurkeztuko dute ostegunean
Beñat Fontanedak ekoiztu eta zuzendu du dokumentala eta elkarrizketen bidez, Gasteiz anitza aldarrikatzen zuen herri ekimenaren jaiotza eta ibilbidea kontatzen du.
2016ko apirilaren 18an Gora Gasteiz eguna ospatu zenetik ia urte bete pasa ondoren, Gora Gasteiz: Izan Kolore dokumentala aurkeztuko dute datorren ostegunean, "hiritarron aldarrikapenak bildu zituen arrazismoaren kontrako mugimendu soziala omentzeko".
Hala, Gasteiz anitza aldarrikatzen zuen Gora Gasteiz herri mugimenduaren jaiotza eta ibilbidea biltzen du ikus-entzunezko lan berri honek. Beñat Fontaneda gasteiztarrak ekoiztu eta zuzendu du eta hurrengo ostegunean, hilaren 17an, 19.30ean aurkeztuko dute Europa jauregian.
Elkarrizketatuen hausnarketak ardatz
Dokumentala Gora Gasteiz egitasmoaren jaiotzarekin hasten da. 2014ko udaz geroztik, auzokideen arteko elkarbizitza jokoan jarri zuten adierazpen arrazista eta xenofoboen ondorioz, eman zen herri ekimen honen sorrera azaltzen du. Hainbat pertsona eta mugimenduko aktibista batzuen elkarrizketak ardatz harturik, egin ziren ekintzen errepasoa egiten dute. Besteak beste, Karmele Jaio, Unax Ugalde, Jose Angel Cuerda, Blanca Urgell, Iñaki Iriondo bezalako pertsonaia ezagunek parte hartu dute dokumentalean, baita herri mugimenduari lotuta egon direnak ere.
Elkarrizketaturiko pertsonen oroimen eta hausnarketen bidez, borroko hau gogorarazteaz gain, beste borroka asko piztea du helburu dokumentalak.
Sarrera librea
Gora Gasteiz herri ekimenak gaur egin duen agerraldian Gasteizko hiritar guztiei gonbidapena luzatu diete. Dokumentala ikusteko sarrera librea izango da, aretoa bete arte.
[Albiste hau lizentzia librea erabiliz ekarri dugu hona, artikulu originala Arabako Alean aurkituko duzu]
Hainbat herritarri suzko arma batekin tiro egin ostean bi pertsona zauritu zituzten udaltzainek, horietako bat larri, pasa den martxoaren 21ean, Barakaldon. Tirokatuak kalean bizi ziren magrebtar jatorrikoak izatea ez dela kasualitatea dio 77 elkartek sinaturiko adierazpenak:... [+]
Ostegun goizeko 8:00etatik 12:20era Polizia operazio handia egon da Donostiako Martutene auzoko etxe okupatu batean. Espainiako Poliziak, Ertzaintzak eta Udaltzaingoak elkarrekin egin dute operazioa, “atzerritarren bulegoaren operazioa” dela azaldu dute. Donostiako... [+]
Arrazakeria, diskriminazioa eta islamofobia salatu ditu langileak, eta Iruñeko Lan Ikuskaritzaren aurrean elkarretaratzea egin dute, SOS Arrazakeriak eta LAB sindikatuak deituta. Ikuskaritzak salaketa itxi du, eta onartu egin du Misericordia enpresaren argudiaketa, dioena... [+]
Donostiako Egia auzoan, azken hilabeteetan, bizilagunen artean segurtasunaren inguruko kezka handitu da, eta “beldur eta urduritasunak duen garrantzia aitortu eta sentimendu horiei lekua” egin behar zaiela aldarrikatu dute.