GHK-k erraustegia lizitatu du eta milaka herritarrek Donostiako kaleetan salatu dute

  • Erraustegiaren aferan egun erabakigarria izan da abenduaren 27a. GHK-k enpresa-talde pribatu baten esku utzi du Zubietako plantaren eraikuntza eta kudeaketa eta horren kontra mobilizazioa jendetsua egin dute Donostian. Epaitegian, bestalde, lizitazioari eragin diezaiokeen erabakia hartzeke dago.

ARGIA @argia
2016ko abenduak 27
Erraustegia egin behar duten eremua Zubietan (arg: Dani Blanco / ARGIA)
Errausketaren Aurkako Mugimenduaren mezuak abenduaren 27ko lizitazioaren aurrean

Zero Zabor blogean jaso dugu Errausketaren Aurkako Mugimenduak abenduaren 27ko manifestazioan irakurritako mezuak. Lotura honetan ikusi ahal dituzue.

 

GALERIA | Milaka lagun bildu dira Donostian errausketaren kontra

Mobilizazio oso jendetsua egin da astearte eguerdian Donostian. Dani Blanco ARGIAko kazetariak honela bildu du bertan ikusitakoa:

 

Errausketaren Aurkako Mugimendua: "Aurrera jarraituko dugu erraustegi kriminal hau gelditu arte"

Milaka lagun bildu dira Donostian Zubietako erraustegiaren lizitazioaren aurrean protesta egiteko. Gipuzkoa Plaza jendez lepo bete da astearte buruzuri batez. Markel Olano diputatu nagusiak "entzungo ditugu protestak" onartu du, esleipena iragartzeko unean.

Jendeak txistu eta burrunbaz hartu du GHK-ren erabakia. Antolatzaileek, Errausketaren Aurkako Mugimenduak, testu bana irakurri dute martxaren hasieran eta amaieran. Erraustegiaren kontra duela 14 urtetik hona izandako mugimenduaren eta azken urteetan sorturiko alternatiben inguruan mintzatu dira lehenbizi: "Duela ia zortzi urte ekaitz haren erdian atez ateko bilketa abian jartzeko ausardia izan zuten udal haiei, hautetsiei eta herritarrei gure eskerrak eman nahi dizkiegu: Usurbil, Hernani, Oiartzun, Oñati, Antzuola, Orendain eta  abarri. Gure eskerra ere gaikako beste sistema benetan ondo kontrolatuekin aurrerapen handiak lortu dituzten beste udalei", esan dute txalo zaparrrada artean.

Ingurumenari eta osasunari egingo dio kaltea gogoratzeaz gain, lizitazioak ekonomikoki Gipuzkoako herriei zer suposatuko dien nabarmendu dute irakurritako testuan: "35 urtez udalak eta herritarrok zorpetuko gaituen zor ilegitimoa salatu nahi dugu. Herritarrak ohartarazi behar ditugu lapurreta honetaz, nolaz erraustegia egiten badute, beren osasunaz eta ingurumenaz gain  jendarte osoak nozituko dituela ondorioak, klase guztietako zerbitzu sozialen murrizketekin", azaldu dute.

Martxaren amaieran irakurritako beste testuan aldarrikapen sendoa egin dute errausketaren kontra eta hondakinen kudeaketa zentzuzko baten alde  "aurrera jarraitzeko". Udal agintariei euren subiranotasuna "zorrotz" defenda dezatela eskatu diete "eskumenak esku pribatuetan utzi gabe".

Aferak oraindik soka luzea izango duela zalantzarik ez izateko esaldi batekin amaitu du hizlariak: " Aurrera jarraituko dugu Gipuzkoako herritarrok erraustegi kriminal hau gelditu arte".

 

GHKren batzarrak erraustegiaren lizitazioa onartu du

GHK-k Urbaser enpresaren eskuetan utzi du gipuzkoarren hondakinak erre eta kudeatzeko eskumena eta 768 milioi euro ordainduko diete herritarrek horretarako. 

Markel Olano eta Jose Ignacio Asensiok eman dute erabakiaren berri prentsaurrean: "Egingo genuela esan genuen eta ondo egingo dugu", azaldu du Olanok. Egun garrantzitsutzat jo dute gaurkoa, haien esanetan "irtenbide honek konpondu egiten ditu Gipuzkoarren beharrak".

GuraSOSek parte-hartzearen inguruan Donostiako instrukzio epaitegian jarritako helegiteaz galdetuta, Jose Ignacio Asensio diputatuak "Gipuzkoak ezin du itxaron" erantzun du.

Hala, erraustegiaren esleipena zihurgabetasun egoeran dago momentu honetan, auzitegian parte-hartzearen eta Eusko Jaualritzaren Ingurumen baimenaren inguruan hainbat erabaki hartu beharko baitira. Hala ere lanak lizitatu egin dira eta GHK-ko agintariek auzitegiei itxaron gabe abenduaren 27 honetan hartutako erabakiak ondorio larriak izan ditzake balizko kalte-ordainei dagokienez.

Jendetza bildu da Gipuzkoa Plazan erraustegiaren kontra

Hasi da erraustegiaren kontrako bilkura Donostian, Gipuzkoa Plazan. Eguerdiko 12:00ak jo bezain pronto txistuekin eta soinu handia eginez ekin diote mobilizazioari. Errausketaren kontrako mediku taldeari, aldiz, txalo zaparrada jo diote bertaratutakoek. Mobilizazioaren hasieran eta amaieran testu bana irakurriko dute antolatzaileek.

 

Jendea hasi da Gipuzkoa Plazara biltzen
GuraSOSek harridura adierazi du epaitegiak ez baitu bere helegitearen inguruan oraindik ebazpenik eman

Gurasosek elkarteak prentsaurrekoa eman du gaur goizean Donostiako Kaxilda liburudendan. Bere ordezkariek "harridura" azaldu dute, Donostiako Instrukzio epaitegiak beranduenez gaur goizean eman behar baitzuen Zubietako erraustegiaren inguruan GuraSOSek jarritako helegite baten inguruko ebazpena, baina oraindik ez du horrela egin.

 

Zubietako Erraustegia: asteotan jokatzen denaz 14 gako eta galdera

Abenduaren 27an Gipuzkoako erakunde nagusiak kontrolatzen dituzten EAJ eta PSEko agintariek urrats berri eta –2011an nahi izan zuten bezala– atzerabiderik gabekoa egingo dute aspaldi erabakitako errauste planta Zubietan eraikitzeko bidean. Aste hauetan gauza asko daude jokoan Gipuzkoan eta egunotan egindako edo egin gabe lagatako ekintzek ondorioak ekarriko dituzte gutxienez 2051 arte. Hona gakoetako batzuk, nire ustean:

[Pello zubiriaren analisia irakurtzeko sartu hemen: http://www.argia.eus/blogak/pello-zubiria/2016/12/22/erraustegia-asteotan-jokatzen-denaz-14-gako-eta-galdera/

Erraustegiaren lanak esleitzeko asmoa GHK-k bertan behera utz dezala eskatu dute EH Bilduk, Ahal Duguk, Ezker Anitzak eta Equok

Abenduaren 27an erraustegiaren aurka mobilizatzeko deia egin du Donostian Erraustegiaren Aurkako Mugimenduak. Eguerdiko hamabietan izango da mobilizazioa, proiektua “eztabaida publikorik gabe inposatzen” ari direla salatzeko.

Irakurri albistea osoa hemen: http://www.argia.eus/albistea/erraustegiaren-aurkako-mobilizazioak-epaitegien-erantzuna-iritsi-zain

Kanal honetan artxibatua: Gipuzkoako erraustegia

Gipuzkoako erraustegia kanaletik interesatuko zaizu...
2017-07-13 | ARGIA
GuraSOSek helegitea galdu du GHKren kontra Donostiako auzitegian

Donostiako auzitegiaren 3. salak ez du ontzat eman GuraSOSen helegitea, eskatzen bertan behera uzteko 2016ko uztailean hasitako erraustegiaren lizitazioa.


GuraSOSek erraustegiaren finantzen iruzurra salatu du Madrilgo Senatuan

GuraSOS elkarteko ordezkariek Madrilgo Senatuan agerraldi publikoa egin dute Gipuzkoako erraustegiaren finantzaketan dagoen iruzurra salatzeko.


2017-07-04 | Estitxu Eizagirre
Naturgas Usurbilgo Udalaren baimenik gabe ari da urratzen erraustegirako gas bidea

Uztailaren 3ko goizean Zubieta eta Usurbil arteko bidea itxi zien Naturgasek, ez bi udal erakunde horiei ez herritarrei inolako jakinarazpenik igorri gabe. Usurbilgo Udaleko Gobernu Batzordeak baimena ukatua dio Naturgasi, "zerbitzu publikoei eta herritarrei pasabidea bermatzeko plana" aurkezteko eskatuz.


Tentsioa Zubietan erraustegira gasa eramateko lur urraketak hasi direnean

Ekondakin enpresa elkarteak gaur, astelehena 3, ekin dio Zubietako erraustegira gasa eramateko hodia lurperatzeko lurrak harrotzeari. Inguruko bideak moztu dituzte eta zenbait herritar bildu da inguruetan protestan. Donostiako alkateak udaltzainak bidali dizkie.


Erraustegiaren aurkako gose grebaren digestioa

Kalean egin dugun aste honetan herritar askorekin hitz egiteko aukera izan dugu. Agintariek lotsagabeki ezkutatzen duten informazioa zabaltzeko baliatu dugu, baita herritarrekin iritziak partekatu eta eztabaidatzeko ere. Eta ikusi dugu, informatua dagoen herritarrak ez duela erraustegirik nahi.


Baserritarren protesta Aldundiaren aurrean: "Erraustegiak elikadura burujabetza kutsatzen du"

Baserria XXI elkarteko laborariek, agronekazaritzan ari diren baserritar gazteek, erraustegiaren aurkako protesta eraman dute Gipuzkoako Foru Aldundiaren atariraino. Eguerdiko 12:00etan hasita, antzerki labur batean irudikatu dituzte nekazariak herritarrentzako elikagai sanoak ekoizteko lanean, ondoren errausketa inposatzen dutenak –Markel Olano aldun nagusiak hezur-mamituak– barazkiok kutsatzen, azkenean baserritarrek kutsatzaileak airean ihesi bidaltzen dituzten arte.


Eguneraketa berriak daude