argia.eus
INPRIMATU
Gaztetxea lortzeko bidean, formakuntza saioak antolatu dituzte Hendaiako gazteek
  • Hendaitz gazte asanbladak sei urte daramatza bere proiektuak aurrera eramateko espazio autogestionatu bat lortzeko borrokan.

Topatu.eus @topatu_eus 2016ko apirilaren 13a

"Gazteok toki bat behar dugu, espazio autogestionatu bat, gure artean ezagutu, eraiki eta bertan ikasteko leku bat". Ez da eskakizun berria. 2010ean hasi zuten borroka hori Hendaiako gazteek. Duela bi urte txosten bat aurkeztu zioten auzapezari, baina hark erantzun zien herriko etxeak ez duela gazteentzako lokalik. Azken hilabeteetan lanketa berezia egiten ari dira gazte gehiagok aldarriarekin bat egin eta herriko etxeari presioa egiteko. Elkarretaratzeak egin dituzte hilero, eta ahalduntze saioak antolatu dituzte hurrengo hilabeteetarako. Udan proiektu ezberdinak aurrera eramateko indarrak biltzen ari dira, eta horregatik azpimarratu dute garrantzia berezia duela antolatu dituzten hitzorduetan parte hartzeak. 

Larunbatean eman zioten hasiera saioei. Tolosako Gazte Asanbladako kideekin aritu ziren solasean, beraien esperientziatik ikasi nahian. Hurrengo hitzordua apirilaren 30ean izango da, 10:00etan Baleak elkartean Gure kabuz ala hil dokumentala aurkeztuko dute, eta lanaren egileekin solasean aritzeko tartea ere hartuko dute. Maiatzaren 7an, aldiz, Kortxoeneako kideak hartuko dituzte, eta ekainaren 4an okupazioak juridikoki izan litzakeen aukera eta ondorioez informatuko dira Hartzea Lopezen eskutik.

Albiste hau Topatu.eus-ek argitaratu du eta CC-by-sa lizentziari esker ekarri dugu ARGIAra