Gazara Martxa-k Egiptoko lurretan aurrera egitea lortu ez zuenez, itsasoz ahaleginduko dira orain. Israelen blokeoa haustea eta genozidioa salatzea izango da helburua, espedizio berrian parte hartuko duten Euskal Herriko kideek eta Gazarako Mugimendu Globalekoek adierazi dutenez. Gasteizen egin dute agerraldia, Eskoriatza-Eskibel jauregiaren atarian, bandera palestinarrak bistan-bistan ipini dituztela.

Euskal Herriko 50 inguru gizarte mugimenduk adierazi diete babesa Global Sumud deituriko ontzidiari. Espedizioaren helburua Gazaraino iristea izango da, korronte humanitario bat irekitzen saiatzea, finean ahalik eta laguntza humanitario gehien sartu dadin, eta herrialdetik alde egiteko beharra eta nahia duten pertsona guztiak atera daitezen. 

44 herrialdetako pertsonek osatutako ekimena izango da Global Sumud ontzidiaren bidaia. Bartzelonatik irtengo dira hainbat itsasontzitan abuztuaren 31n; tartean, lau euskal herritar. Horiei eta gainontzeko militanteei elkartasuna adierazteko bi autobus aterako dira bezperan, bat Bilbotik eta bestea Donostiatik; lehenak geldialdia egingo du Gasteizen eta besteak Iruñean. 

Ekimen gehiago, helburu berarekin

Gasteizen egin dute prentsaurrekoa, ez alferrik: dozenaka pertsona, astelehenean hasita, itxialdia eta baraualdia egiten ari dira Arabako hiriburuan. Ostiralera arte iraungo dute. Bestalde, Gasteizen bertan, Eusko Legebiltzarraren aurrean elkarretaratzea deitu dute astearte honetarako, Jaurlaritzari eskatzeko Israelekin eta "sionismo kriminalarekin" harreman oro eteteko. 

Horrez gain, datorren asteko asteartean, irailaren 2an, gizonezkoen Espainiako txirrindularitza itzulia Arguedas eta Izaba artean jokatuko denez, litekeena da ekintzarik antolatzea, Israelgo talde bat lehian ari delako boikot mezu eta eskaeren gainetik. Azkenik, irailaren 6an, larunbatez, itsas-lehorreko martxa antolatu dute Bilboko itsasadarrean. Santurtzin hasi eta Bilboko itsasmuseum-en amaituko dute.