“Gasteizko zentroko laborategi pribatu batek koronabirusaren PCR testa egiten die partikularrei, enpresei, kirol-klubei eta baita Osakidetzak bigarren baieztapen-proba bat ukatu eta alta eman nahi dien pazienteei ere”, dio Iker Rioja kazetariak sinaturiko berriak. Testa egiteko baldintza bakarra profesional kolegiatu baten sinadura da, eta emaitzak 24 edo 40 ordutan ematen ditu laborategiak.

Larunbatean, agerraldi telematiko batean, testak modu horretan egiten dituzten laborategi pribaturik ote dagoen galdetu zioten Osasun sailburu Murgari: "Ez dut horrelako praktiken berririk", erantzun zuen. Publikoa da osasun krisiaren hasieran Alaves edo Baskonia kirol enpresek haien jokalari eta langileentzako test pribatuak kontratatu zituztela.

Osasun pribatua, publikoaren esanetara?

Martxoaren 14an alarma egoera ezarri zenean, Espainiako Gobernuak osasun pribatuaren bitartekoak publikoaren mesedetan jartzeko eskumena hartu zuen. Murgak agindu bat sinatu zuen ostiralean, zentro pribatuak behartzen dituena beren errekurtsoen berri ematera eta Osakidetzaren eta Osasun Ministerioaren irizpideak jarraitzera. Aginduak testaren prezioak ezartzeko aukera ematen dio administrazioari, eta isunak ezartzeko aukera aurreikusten du.