Baietz Barriolak egurra eman! Titinek oraingoan ez dik huts egingo! Barriola ez duk 16ra helduko! Baietz Titinek 15 tanto egin! Bihar Lau t’erdiko finala jokatuko dute Gasteizko Ogeta pilotalekuan Abel Barriolak eta Titin III.ak. Hara joaten bazarete, agian egingo duzue apusturik. Baita partidua telebistaz jarraituko duzuenok ere, izan lagunekin, lankideekin, etxekoekin zein tabernazuloan zuen ondoan eseriko den espontaneoarekin. Halakoetan “aditu” bihurtzen gara guztiok. Ideiarik ez izan arren, mihia dantzan jarri eta albokoak xaxatzen hasten gara, hark dirua mahai gainean jartzen duen arte. Horretan abilak gara euskaldunak. Edozein kirol desafiok bultzatzen gaitu besteak baino jakintsuago garela erakutsi nahi izatera.

Duela gutxi arte apustuak paper gainean sinatzen genituen ia beti, baina pixkanaka Internet indarra hartzen ari da. Erosoa da, eta era askotako apustuak egiteko aukera eskaintzen du. Kirol mota guztien ingurukoak, gainera. Futbola, saskibaloia, auto lasterketak eta txirrindularitza bezalako kirol ezagunez gain, nazioartean hainbeste jarraitzaile ez dituzten kirolek ere badute lekurik Interneteko apustu etxeetan. Betfair.com enpresak, adibidez, Barriola-Titin finalerako apustuak antolatu zituen.

Kafe, garagardo eta ke arteko apustuak egiteko aitzakia gehiegirik behar ez genuenok, sentipen kontrajarriak sorrarazi dizkigun albistea jaso berri dugu: datorren urte hasieran lehenengo apustu-etxeak irekiko dituzte Araban, Bizkaian eta Gipuzkoan. Hiru enpresek lortu dute lokalak irekitzeko Eusko Jaurlaritzaren lizentzia: Euskal Kirol Apustuak (EKASA), Teleapostuak (Aspe eta Egursport enpresen elkarlanetik sortua) eta Garaipen Victoria Apustuak (Codere, William Hill eta Gabascar –Asegarce eta Bainet biltzen dituen enpresa matriza– enpresek osatzen dute). Apustu-etxeek Ingalaterrakoen tankera izango dute. Apurka-apurka irekiko dira eta 0,20-100 euro bitarteko apustuak egin ahal izango dira estatu mailan aitzindari diren lokal horietan. Euskaldunen neurrira egokitutako apustuetan parte hartzeko aukera ere emango dute. Pilotaren, estropaden eta herri-kirolen ingurukoetan, esaterako.

Lokal horien proiektuak ez du gugan eraginik izango. Baina aipatutako hiru enpresek bingo, kasino eta tabernetan ere jarriko dituzte apusturako makinak. Tabernak dira gure eztabaida eta adarjotzeen agertoki, eta alboan apustuak egiteko aukera eskainiko duen makina izateak zeresanik eman dezake. Albistea jakin-minez jaso dugu, baina beldur pixka bat ere badugu, litekeena delako tentazioari ezin eutsi eta edozein kirolen inguruko apustuak egitea. Horregatik sentipen kontrajarriena. Zentzuz jokatzea besterik ez dugu.