Haren alaba Joanak kontatu duenez Xistorren aldeko komitearen blogean, Haranburuk osasun arazo larriak jasan ditu bere espetxealdian, nahiz eta gaur ez dagoen gaixo larrien zerrendan. Belaunetan arazo handiak dauzka, operazio bat eskatzen dutenak. Azken urteok Okzitaniako Lannemezaneko segurtasun handiko presondegian daramatza.

Joan den martxoan bere alde mobilizatutako lagunei idatzitako gutun batean Xistorrek kontatu ditu militantzia politikora bultzatu duten zenbait pasarte: "Gogoratzen hasita, ez dauzkat ahantzirik Guardia Zibilak Arabako Legution 1973an egin zizkidan torturak. Inor ez zuten atxilotu tortura haien ondorioz (eta, gure artean esateko, oraindik harro nago horretaz!). Caudilloaren errejimenaren pean garai hartan euskal probintziak salbuespen egoeran zeuden eta ni Gasteizen bizi nintzen. Beranduago, 1986an, GALen atentatu baten biktima izan nintzen, 9mmko 4 bala jaso nituen (interesik balu, kontatzen ahal dizuet nola gertatu zen eta baita ere zerbatik egiten zidaten tiro ni ezezaguna izanik ez nintzenean atentatuaren jomuga)".