Berdeak taldeko zenbait diputatuk antolatuta, haustura hidraulikoari buruzko jardunaldia egingo dute gaur goizean Europako Legebiltzarrean, Bruselan.
Lehenbiziko zatian, frackingari buruzko legedia aztertuko dute, eta beren burua frackingik gabeko izendatu dituzten zenbait lurralderen adibideak aurkeztuko dituzte. Horrez gain, teknika horren aurka ari den AEBetako aktibista batek bere esperientziaren berri emango du.
Jardunaldiaren bigarren zatian haustura hidraulikoaren inguruko mito nagusiez berba egingo dute zenbait zientzialarik. Zehazki, frackingaren aldekoek zabaldu nahi dituzten honako ideiak funtsik gabekoak direla frogatzen saiatuko dira: arbel-gasa erauztea klimarako ona dela; indarrean dagoen legedia nahikoa eta egokia dela; arbel-gasak ekonomiari mesede egiten diola; eta haren esplotazioak osasun publikoari egiten dion kaltea oso txikia dela.