Sei orduz plataforma hauetara sartu ezinik egon ziren urriaren 4an erabiltzaileak, arratsaldeko 18:00etatik gaueko 00:30etara. Mark Zuckerberg jabeak adierazi du “zerbitzarien konfigurazio aldaketan egondako akatsak” eragin zituela arazo hauek. Antza denez, Facebookeko sareko azpiegitura mantentzen dutenek suebakietan eguneraketa bat egin zuten eta nahi gabe sare osoa bota.
Zerbitzu digitalen etenak arakatzen dituen Downdetector plataformaren arabera,egun horretan bost milioi txostenetik gora jaso zituen blokeoaren lehen orduan eta adierazi du eten hau “orain arte ikusitako handiena” izan dela.
Telegram eta Signal gora
Telegram mezuak bidaltzeko plataforma egun bakarrean pasatu zen AEBetan deskargatutako doako aplikazioetan 56garrena izatetik boskarrena izatera. Signalen ere nabarmen gehitu zen erabiltzaile kopurua.
Facebooken trapu zikinak agerian
Atzoko arazoekin lotura zuzenik izan ez badu ere, milioika erabiltzaile dituen plataformak bere trapu zikian haizatuta ikusi ditu azken bi asteotan. Frances Haugen ingeniari eta kudeatzaile ohiak hainbat barne dokumentu filtratu zituen Wall Street Journal hedabidean, besteak beste. Eta iragan igandean CBS hedabidean hitz egin zuen.
Wall Street Journal hedabideak irail erdialdera zera argitaratu zuen, Haugen-en txostenetan oinarrituta: Facebook hiru urtez aritu dela ikertzen bere Instagram plataforma, honek nerabeengan dituen eraginak ezagutzeko. Ikerketek adierazten omen dute emakume idealaren gorputzaren mitoa zabaltzen dutela sareetako eduki askok eta honek arriskuak dakartzala nerabeen osasun mentalarentzat.