Harremanak sortzeko, topaketa eta trukaketa plataforma da Eusko-Diaspora, euskal komunitate osoa harremanetan jartzeko helburuarekin jaio dena. Eusko Ikaskuntzak bultzatu duen proiektuaren bidez, lotura iraunkorrak garatu eta kolaborazio zubiak sortu nahi dituzte Euskal Herrian eta atzerrian dauden euskaldunen artean.
"Harremanak erraztuz sortuko liratekeen ekimenak sustengatu nahi ditu proiektuak", azaldu dio Maialen Zamponi Eusko-Diasporaren kudeatzaileak Kazeta.info-ri. Egitasmoa publiko mota ezberdinei zuzenduta dago eta enpresa, unibertsitate edota elkarteen ekimenak biltzeko balioko du.
Proiektuaren webgunean ikusi daitekeen bezala, Eusko-Diasporak hiru ardatz nagusi ditu: Elkartasunezko turismoa, etxe trukaketak eta norberaren etxean jendea hartzea sustatzen duena; enpresa-sare baten sorrera, lan eskaintzak eta proiektu eta ekimenak argitaratzeko; eta, azkenik, kultura interaktiboki trukatu eta partekatzeko gunea.
Audrey Hocek zuzendutako euskal emigrazioari buruzko serie dokumentala ere abiarazi du Eusko-Diasporak. Lehenengo bideoak webgunean ikusi daitezke eta, besteen artean, Buenos Airesen, New Yorken edota Quebecen dauden euskaldunen testigantzak jaso dituzte.