Lapurdiko eskola batetik saiatu dira datorren ikasturterako Ganbara Hostel Bilbaon aterpea lotzen, baina Behatokian salatu dutenez, idatzizko komunikazioan euskaraz aritzeagatik zera esan diete azkenean: “Espainolez mintzatzen ez ginenez, ez gintuztela beren hotelean hartuko”.
Hilero bezala, ekaineko hizkuntza urraketen berri eman du Hizkuntz Eskubideen Behatokiak, eta bertan, Lapurdiko ikastetxe batetik xehe kontatu dute gertaturikoa: datorren ikasturterako ateraldia prestatzen ari zirela, Bilboko aterpetxe horrekin jarri ziren harremanetan, idatziz, eta euskaraz komunikatzen ahalegindu ziren, baina aterpetxetik erantzun zieten ez dakitela euskaraz eta mezuak itzultzailea erabilita ari zirela irakurtzen, bulegoan inork ez duela euskaraz hitz egiten. “Eskertuko genizuke komunikazioa ahalik eta argiena izan dadin hemendik aurrerako komunikazioak gaztelaniaz izatea” eskatu zioten aterpetxetik eskolari, gaztelania hutsean.
Enpresa horrek atzerriko hizkuntzak onartzen dituen arren, Bilbon ofiziala den hizkuntza ez du onartzen, “eta bezeroari, nahitaez, gaztelania edo ingelesa inposatzen die”
Azkenean, berriro ere gaztelaniaz, hala esan diete ostatutik, Lapurdiko eskolak salatu duenez: “Nahiago dugu erreserba hau ez baieztatu, etorkizunean gaizki-ulerturik izan ez dadin. Ulertzea espero dugu eta zuen beharretara hobeto egokituko den hostela aurki dezazuela opa dizuegu”.
Alegia, idatzizko komunikazioa euskaraz onartu baino, nahiago izan du bezeroa galdu, komunikazio hori bermatzeko tresnak egon, badauden arren. Hala dio Behatokiak, eta kritikatu du enpresa horrek atzerriko hizkuntzak onartzen dituen arren, Bilbon ofiziala den hizkuntza ez duela onartzen, “eta bezeroari, nahitaez, gaztelania edo ingelesa inposatzen die”.
Behatokiaren hitzetan, “premiazkoa da bezeroak euskaraz artatzeko lege betebeharrak garatzea ostalaritza, merkataritza eta turismoari lotutako enpresetan, baita ez-betetzeen aurrean zehapenak ezartzea ere”.