Abenduaren 28an San Mamesen Euskal selekzioaren partida jokatuko dute. Euskadiko Futbol Federazioarekin (EFF) akordiorik lortu ez arren jokalariek urtero egiten zen gabonetako partida jokatzea erabaki dute. Publiko egin dituzte bai Federazioari (PDF) bidalitako gutuna eta baita prentsari (PDF) bidalitakoa ere. Hori adierazi dute prentsara zabaldu duten dokumentu batean. “Partida hau ziklo baten amaiera eta aro berri baten hasera izatea” nahi dutela dio jokalarien oharrak, baita Euskal Herriaren elastikoa janzteko eta koloreen alde futbol zelaian zein behar den leku guztietan defendatzeko prest daudela. Dokumentuan EFFri publikoki sei puntu onartzen dituen galdetzen zaio, eta hala balitz, "Euskal Herria izena egokiagoa dela" uste arren, Euskal Selekzioa izenarekin jokatzeko prest agertu dira, beti ere, argi uzten bada zazpi lurralde historikoak ordezkatzen dituen selekzioa dela, "eta ez Espainiako selekzio autonomiko bat".