Marylise Lebranchu Frantziako Estatuko deszentralizazio ministroak adierazi du Euskal Lurralde Elkargoa sortzea ez duela posible ikusten eta Frantziako Gobernuak ez duela sortuko. "Ezin onartuzkotzat" eta "oso larritzat" jo ditu adierazpenak Hautetsien Kontseiluak.
Urriaren 11ean Hautetsien Kontseiluko ordezkaritzarekin izandako bileran emaniko diskurtsoa aldatu izana leporatu dio Jean-Jacques Lasserre, Hautetsien Kontseiluko presidenteak. "Haren diskurtsoa engainua da" esan du.
Sauveur Bacho Arberatzeko auzapezak Euskal Irratietan jakinarazi duenez, erantzun horren ostean "ez dugu horretan utzi behar, proposamen bat dugu landurik eta aitzina eraman behar dugu". Bachoren ustez mobilizazioa maila bat igotzea da aurrerantzean egin beharrekoa.
Sylviane Alaux senatari sozialista ere haserre agertu zen atzo baina aurrera egingo dutela azaldu zuen. 2013an aurkeztuko den deszentralizazio legearen koadroan, Ipar Euskal Herriak atal bat izango duen esperantza ez du galdu.
Christine Bessonart Ipar Euskal Herriko Auzapezen Biltzarreko buruak nabarmendu du Frantziatik keinu baikorrik ikusi ez arren, maila lokalean egin diren urratsak esperantzagarriak direla.
Hautetsien Kontseiluak bilera egingo du datorren larunbatean. Departamentu berriak izango dituen eskumenak eta beste zortzi eskumen berezi izango dituen Lurralde Elkargoaren proposamenari buruz bozkatuko dute hautetsiek. Alauxek jakinarazi du ezezko erantzunak "digeritzeko" prest daudela eta "nola jarraitu behar duten ere" pentsatzeko garaia dela.