Europako Gazteen Topaketak (EGT) antolatu ziren santuaren jaioterrian, Teresaren bizitzan interesaturik zeuden hainbat gazte jasotzeko. Egun, “ahaldundutako” emakume gisa hartu genezakeen moja horrek, Karmeloko ordena biziberritu eta hainbat komentu sortu zituen Penintsulan zehar. Gasteizen, 1900an jaio zen ordena honetako lehen eliza.

Baina santu honek gure tokiko elizarekin izan dezakeen loturaz gaindi, eta nahiz eta Espainiako Gotzainen Elkarteak elizbarruti guztiei parte hartzeko aukera eman, oihartzunak ez omen zuen Araban eraginik izan. EGT-tan estatuko toki guztietatik etorritako gazteak ikusi zitezkeen, gipuzkoar eta bizkaitarrak barne, baina ez nuen Arabako talderik ikusi. Gasteizko Elizbarrutiko webgunean ere ez dago ezer Topaketari buruz, deialdia Europa mailakoa izan arren –horregatik zeuden Avilan hainbeste italiar eta poloniar–.

Gasteizko Elizbarrutiaren jarrera ezin da ulertu, ekitaldia sikiera quorum eta parte-hartzen aldetik oso arrakastatsua izan baitzen. Saretik ez bada, parrokien bidez hedapena eman ziezaiokeen. Nik behintzat Burgosko Gaztediaren Delegazioarekin dudan harremanagatik jabetu nintzen EGT-aren existentziaz, bai eta honi esker bertaratu.

Elizbarrutiak ekitaldiari hedapenik eman bazion, pentsa liteke erantzun nahikorik ez zuela jaso, eta ondorioz, gogoeta egiteko garaia da: nola jokatzen du Arabako Elizak gazteekin? Hauen parte-hartzea eta fedea sustatu egiten al du? Beste herrietako kristauekin harremanetan jartzera bultzatzen al ditu? Edo harreman horiek mozten al ditu? Hala bada, zergatia ez dago oraindik argi, eta jarrera unibertsala duen katolikotasunarentzat larria dateke.

Aitor Castañeda Zumeta (Gasteiz).

Gizarte Ikerlaria EHUn.