Alemaniako Welt am Sonntag egunkariari aurreratu dio albistea igandean plazaratutako elkarrizketa batean, argudiatuz ezer baino lehen Europak ohartu behar duela bere atzerri politika ez dutela beste potentziek seriotan hartzen.

“Ez duzu armada europarra sortu behar berehala erabiltzeko. (…) Baina europarrok ejertzito bakar bat daukagula erakutsiz Errusia ohartuko da seriotan ari garela Europar Batasunaren balioak defenditzea aldarrikatzean”.

Juncker aspalditik ari da aipatzen Europaren integrazio bidean estatuek dauzkaten egitura militarrak konbinatzeak eraginkortasuna handitzea ekarriko lukeela. “Horrelako armada bateratu batek lagunduko liguke atzerriko politika komuna hobeto diseinatzen. Europaren irudiak gogor sufritu du bere atzerri politikaren alorrean, ez gaituzte erabat seriotan hartzen”.

Nahiz eta Junckerrek garbi adierazi duen proposatzen duen bateratzeak ez diola konkurrentziarik egingo OTANen gorputzari, zenbait gobernu oso kritiko atera zaio bidera.

Erresuma Batuko gobernuaren bozeramaile batek adierazi dio The Guardian egunkariari: “Gure jarrera ura baino gardenagoa da honetan: defentsa erantzukizun nazionala da, ez Europar Batasunarena, eta ez da sartzen gure kontuetan ez gai honetan eta ez Europako armadaren proposamenean ezer aldatzea”.

Ez da hain diplomatikoki mintzatu kontserbadore britainiarren artean defentsa eta segurtasun batzordeko bozeramailea den Geoffrey van Orden: “Europako armada sortzeko etengabeko ahalegin hau geldiarazi beharra dago. Europako burokratek krisi bakoitzean ikusten dute Europar Batasuna zentralizatzeko helburuetan urrats berriak egiteko aukera bana”.

Aldiz, Junckerren proposamena bete-betean babestu du Alemaniak. Ursula von der Leyen defentsa ministroak esan du ohar batean “europarrok etorkizunean Europako armada edukiko dugu, nahiz eta ez gertatu epe laburrean. Ministroak esan duenez, armada honek Europaren segurtasuna sendotuko du eta “sendotuko du europarron indarra Atlantiko gaineko aliantzan”.

Welt am Sonntag egunkariak bildu du Alemaniako parlamentuan atzerri politika batzordearen buru den Norbert Röttgenen iritzia: “Europako herrialdeek dirutza izugarriak gastatzen dituzte armadetan, Errusiak baino hainbat bider gehiago. Baina gure ahalmen militarrak ez dira aski segurtasunaren ikuspegitik. Hori gertatzen da mini-armada nazionalak dauzkagulako, sarritan gauza berak eta aldi berean baina formatu txikietan erosten dituztenak”.