ETAren armagabetze egunaren zuzeneko kontakizuna

  • Goizean goizetik hasi da ETAren armagabetzea, epizentro politikoa Baionan dutela. ARGIAn egunaren jarraipena egiten ari gara bertatik bertara.

ARGIA @argia  |  Jenofa Berhokoirigoin @Jenofa_B  |  Lander Arbelaitz @larbelaitz  |  Dani Blanco
2017ko apirilaren 08a
Gakoak
Txetx Etxeberryk gizarte zibilaren izenean geolokalizazioak eman dizkio Boloniako artzapezpikuari. (Irudia: Berria)
Iñigo Urkullu: "Epikatik etikara"
Estefania Beltran de Heredia, Ram Manikkalingam, Iñigo Urkullu eta Josu Erkoreka (Argazki Press)

Epikatik etikara izeneko adierazpena irakurri du Iñigo Urkullu EAEko lehendakariak. Azken asteetan ETAren armagabetzea burutu zein lanean aritu direla adierazi du. "Gaur ez da ezer hasten, ezta bukatzen ere. Bizikidetzaren alde lanean jarraitzen dugu, orain, eskenatoki hobean", adierazi du.

Hasiera batean Josu Erkoreka Eusko Jaurlaritzako bozeramaleak egin behar zuen agerraldia Donostian, eta azken orduan Iñigo Urkullu atera da prentsaren aurrera, Nazioarteko Egiaztatze Batzordeko kide Ram Manikkalingamekin batera.

Bake artesauen argazkiak armategietan

Bakearen artisauek zortzi zuloetako argazkiak argitaratu dituzte, bakoitzean dauden armen inbentarioarekin batera.

 

 

Espainiako Gobernua: "Ez da inpunitaterik izango"

Espainiako Gobernuak ETAren armagabetze egunari garrantzia kendu nahi izan dio, ekimen "mediatiko" gisa definituz eta "bere erabateko porrotetik etekin politikoak ateratzea helburu" duela iritzita.

"Legearen armak erabiliz, Espainiako demokraziaren garaipena izan da, batasun politikoa, nazioarteko kooperazioa eta Estatuko Segurtasun Indarren efikazia eta emanagatik", adierazi du Barne Ministro Juan Ignacio Zoidok.

Frantziako autoritateek aztertu arte ez duela ETAren armamentuaz baloraziorik egingo jakinarazi dute, eta nabarmendu du ez dutela posizio politikoa aldatzeko intentziorik: "Terroristek ezin dute espero fabore traturik eta are gutxiago beren delituekiko inpunitatea"

"ETAk ez du etorkizunik", adierazi du Zoidok. "Erantzun logiko bakarra bandak bere behin betiko disoluzioa iragartzea, biktimei barkamena eskatzea eta desagertzea da".

"Presoak, biktimak eta desmilitarizazioa dira jarri behar ditugu mahai gainean orain"

Arnaldo Otegi eta Anita Lopepek prentsaurrekoa eskaini dute EH Bildu eta EH Bairen balorazioa egiteko.

Euskal jendartearen gehiengoak albiste on gisa hartu duela aipatuz hasi dira, eta poza agertu dute inongo kanpo injerentziarik eta oztoporik sortu gabe aurrera doalako armagabetzea. "Munduan justizia, bakea eta askatasunaren alde borrokan ari diren guztietzat egun pozgarria da".

Azpimarratu dute ETAren armagabetzearen testuingurua ulertu behar dela, eta nazioarteko beste adibide batzuek aipatuz Kolonbia eta Ipar Irlanda kasu, "XX. mendeko estrategiak XXI. mendekoei lekua uzten ari dira".

Euskal gizartea, euskal instituzioak eta nazioarteko komunitatea zoriondu nahi izan dituzte. "Jendartearen parte hartze garrantzitsua kontutan hartu behar da, baina baita erakundeen eta nazioarteko eragileen lana ere!".

Hemendik aurrera, presoak, biktimak eta desmilitarizazioa mahai gainean jarri behar direla adierazi du Otegik. "Horiek dira herri honek aurre egin beharreko hurrengo auziak".

Poza adierazu du azken aldian Ipar Euskal Herrian gauzatzen ari ziren argazki garrantzitsu batzuk Hego Euskal Herrian ere lortu dituztelako, joan den astean PP eta UPN izan ezik alderdi eta sindikatu guztien adierazpen adostuari erreferentzia eginez.

"Desarme honek aukera berri bat zabaltzen du, arduraz jokatu behar dugu eta une historiko honek eskatzen duen egoeraren parean. Baliatu behar dugu bake iraunkorra lortzeko gure herrian. Gaur albiste ona dakarren eguna da, bakearen etsaientzat izan ezik".

Frantziako Barne Ministroa: "Pauso handia da"

Frantziako Barne Ministro Matthias Fekl-ek adierazi du ETAren armagabetze unilaterala "pauso handia" dela.

Iñigo Urkullu lehendakariak prentsaurrekoa 13:15ean

EiTBk zabaldu duenez Iñigo Urkullu lehendakariak ETAren armagabetzeaz prentsaurrekoa eskainiko du 13:15ean.

ETAk 120 arma, 3 tona lehergailu eta munizio kopuru handia utzi du 8 gunetan

Bakearen Artisauek prentsaurrekoa eskaini dute, armagabetzearen berri emateko. Adierazi dutenez, ETAk zortzi gunetan 120 arma, hiru tona lehergailu eta "munizio kopuru kalkulaezina" utzi du.

Lekuotan gizarte zibileko 172 lagun daude, Frantziako polizia iristeko zai.

Jean René Etchegarayren babaes politikoa eskertu dute. "Prozesu honen garrantziaz jabetu da".

11:15ean Arnado Otegi eta Anita Lopeperen prentsaurrekoa

Ezker abertzaleko bi kideek prentsaurrekoa eskainiko dute 11:15ean Euskal Museoan.

"ETAk armak poliziari eman dizkiola esatea intoxikazioa da"

Frantziako AFP agentziak zabaldu eta mundu osoko hedabideak oihartzun ematen ari diren albistean esaten da "ETAk armak Frantziako poliziari" eman dizkiola. Intoxikaziotzat jo du Mixel Berhokoirigoinek ARGIAri eginiko adierazpenetan.

Etchegaray eta Manikalingam: "Frantziako autoritateen esku utzi ditugu geolokalizazioak"

"ETAren armen lokalizazioari buruzko informazioa eman berri digute gizarte zibileko ordezkariek. Frantziako poliziaren esku dago jada". Esaldi horrekin laburbildu daiteke Ram Manikalingam eta Jean René Etchegarayk eman duten prentsaurrekoa. Kazetariz mukuru betetako aretoan Nazioarteko Egiaztatze Batzordearen lana laburbildu du, adieraziz ETAk bere hitza bete duela eta 2014an hasi zela armagabetzea.

Etchegarayren adierazpena osorik

"Ongi etorri, deneri.

Europa eta gainerako nazioarteko komunitateak hemen iragaten denaz ardura dauka. "Europako azken gatazka armatua da eta ordu da buka dadin", hitz hauekin mintzatu zen Jonathan Powell 2011ko urrian Aieteko nazioarteko konferentzia irekitzerakoan.

Geroztik, 5 urte baino gehiago igaro dira. Asko gaude une honen zain geundenak. Aieteko adierazpenaren bost puntuetan, denok gogoan daukagu, ETAren su-eten adierazpenaren ondoren —Aieteko adierazpenaren ondotik berehala etorri zena— bake prozesuan sartzen zela ETAren armategiaren desegitearen abiatzea ere. Gizarteko alde guztiak momentu historiko honen partaide dira. Agurtu nahi ditut laster hitz egingo duten guztiak: agintari zibilak, erlijiosoak. Tokian toki eta nazional mailan, bakoitza bere rolean parte hartu duten guztiak. Eta beharrezko izan zaigun gizarte zibila ere; hain zen blokatzea handia bost urteko itxoite eta itxaropenaren ondoren, bake iraunkor batera iristeko gure herrian eta Europako mendebaldeko azken gatazka armatu honi amaiera emateko".

Izen handiko bi artzapezpiku

Baionan prentsaurrean azaldu dira Manikkalingam, Etchegaray, Txetx Etcheberry eta Michel Tubianarekin batera, bi artzapezpiku: Matteo María Zuppi eta Harold Good.

Lehena Boloniako artzapezpikua da, Francisko Aita Santaren gertuko figura. Bigarrena, Irlanda Iparraldeko apaiza, IRAren desarmea baieztatzen ibilitakoa, Alec Reidekin batera.

Gizarte zibilak geolokalizazioak eman dizkie egiaztatzaileei

Baionako udaletxean egindako bileran, Txetx Etxeberryk ETAren armategien geolokalizazioak eman dizkie Nazioarteko Armagabetzearen Egiaztatzaileen Batzordeari. Berriak bideoa zabaldu du.


ETAren desarmatzea kanaletik interesatuko zaizu...
2017-06-22 | ARGIA
Parisko mobilizazioa abenduaren 9ra atzeratu dute Bakearen Artisauek

Ohar bidez jakinarazi dute azaroaren 25ean egitekoa zen martxa handiaren data aldatu dutela. Frantziako Gobernua bake prozesuan "engaiatzeko" eskaera egingo dute.


2017-05-25 | ARGIA
Guardia Zibilaren armagabetzea irudikatuko dute O˝atin ekainaren 17ko Fan Hemendik egunean

Ekainaren 17an, Fan Hemendik egunaren baitan, Guardia Zibilaren armagabetzea irudikatuko dute Oñatin. Antolatzaileen esanetan "indar okupatzaileek euskal herritarrak torturatzeko eta erahiltzeko erabili dituzten fusilak, bainerak, elektrodoak, poltsak edota kare bizia entregatuko dituzte".


2017-05-14 | Mikel Basabe
Gorpu bizi

Duela ia sei urte, gehiengoaren nahia behingoz betez, ETAk iragarri zigun “bere jarduera armatua behin betiko amaitzea erabaki” zuela. Alegia, armak ez zituela berriro erabiliko. Aukera paregabea, aldebakartasunetik armok non zeuden esan eta erakundea desegiteko. Baina “irabazlerik eta galtzailerik gabeko eskeman” tematurik, errealitateari bizkar eman eta gurago izan zuen “Espainiako eta Frantziako gobernuei dei” egitea, “gatazkaren ondorioei konponbide... [+]


Herritarrek, herritik, herritarrentzat eta herriarentzat

Iragan da apirilaren 8a eta ETA armagabeturik da dagoeneko. Luhusoko ekimena eta gero bake artisauek marrazturikoa gauzatu dute. Geroari so, egunaren bukaeran irakurritako manifestuak finkatzen ditu bake iraunkor eta justu bat lortzeko nondik-norakoak. Izenpetzaileek islatu aniztasuna izanen dute aitzina egiteko indarra. Frantziako eta Espainiako gobernuen inplikazioa ezinbestekotzat joz, elkarrizketari lotzeko deia berresten du manifestuak.


2017-04-16 | Xabier Letona
Zortzi berba zahar etorkizunari begira

Historikoa. Apirilaren 7koa oso egun handia izan zen euskal gatazka modernoaren historian, ETAk iragarri zuen bere armak gizarte zibilaren esku utzi zituela. Kosta egiten da hau idaztea, baina hala da: ETA armarik gabeko erakundea da. 8an sostengua eman zitzaion armagabetze moldeari Baionan.


2017-04-16 | Mikel Aramendi
Enbarazutik kendu

Betetzear izango dira hogei urte, beteta ez badaude, norbaitek esan zuela “ETA soberan dago eta enbarazu egiten du”. Ez zen norbanako haren bat-bateko ateraldia, euskal erakunde ahaltsuenetako baten hausnarketaren sintesia baino.


2017-04-12 | Xabier Letona
Antzerkia, iraganaren kritika eta biolentzia

Gauzarik handiena da ETA arma gabeko erakundea dela. Hortik aurrera egin dezake bakoitzak nahi duen balorazioa Baionako ekitaldiaz, baina hori ez da broma, hori gertaera oso handia da. Eta horrekin arinkeriatan dabilenak –adibidez metroen inaugurazioekin–, errespetu eskasa erakusten du.


Espainiako Gobernuak ETAren armagabetzea ezkutatzeko agindu zion RTVEri

CCOO sindikatuak salatu du apirilaren 8ko albistegiak Moncloatik eta Barne Ministeriotik zuzendu zirela. ETAren armagabetzea albistegien 15. minutuaren ostean aipatu behar zutela agindu zuten.


Luhusokoen eta Frantziako Gobernuaren elkarrizketek ekarri dute armagabetzea

Larunbatean gauzatu zen ETAren armagabetze prozesua Luhusoko ekintzaileen eta Frantziako Estatuaren artean itundua izan zen, Berria-k eta Naiz-ek jakinarazi dutenez. Abenduaren 16an Luhuson bakearen artisauek bultzada erabakigarria eman zioten azken bost urteetako prozesuari eta ondorengo bilerei zein Paris eta ETAren arteko elkarrizketei esker, larunbatean bukatutzat eman zen.


Eguneraketa berriak daude