ETAk agiria plazaratu du, euskal presoek bizi duten egoeraren harira. Mariano Rajoy eta François Hollande jo ditu Angel Figueroa eta Xabier Lopez Peñaren heriotzen "arduradun nagusitzat". Gara egunkariak publiko egin duen agirian, "presoek jasan beharreko sakabanaketa, isolamendu eta zigorrak" salatu ditu erakundeak.
"Sakabanaketa eta salbuespen neurriak, sufrimendu eragile izateaz gain, konponbide prozesua ibilbiderik gabe uzteko dituzte indarrean", dio ETAk. "Estatuak eta Euskal Herriko zenbait eragile politiko aitzakiak asmatzen ari dira prozesuaren blokeoa errotzeko. Denek, bakoitzak bere diskurtsoarekin, egoera politikoan aldaketa esanguratsurik eman ez balitz bezala jokatzen dute, blokeoaren ardura ezker abertzalearen bizkar gainean jarri nahian".
Bereziki EAJri zuzendu zaio ETA: "Euskal preso politikoek jasaten duten egoeraren eta azken gertaera larrien aurrean, PNVren jokabidea ere salatu nahi dugu. Harrigarria suerta badaiteke ere, ez du presoen egoerari konponbidea emateko konpromiso zehatzik hartu. Bitartean, blokeoaren arduradun den Espainiako Gobernuari leialtasun osoa eskaintzen dio".
"Une erabakigarrian gaude, konponbide osoa baitago jokoan", dio agiriak. "Mendeetako gatazka gaindituko bada, ez dago ikusle paperean esperoan egoterik. Euskal preso politikoen egoerari eta blokeo jarrera gotorrei herriaren nahiarekin eta urratsekin aurre egin behar zaie".