El confidencial atari digitalak argitaratu duenaren arabera, Kataluniak independentzia aldarrikatu eta 155. artikulua indarrean jarri berritan hitzartu zen kanpaina. Estatu Komunikazioko idazkari Carmen Martinez de Castrok Espainiako Estatuko zortzi enpresa garrantzitsuenetariko goi agintariak deitu zituen “gosari” batera. Gobernua egoera politikoarekin arduratuta zegoela helarazi zien bertan.

Martinez de Castroren esanetan, Generalitateak kanpo enbaxadak erabiltzen zituen “bere proiektu sezesionistaren inguruko eztabaida erreferendumaren izpiritu demokratikoaren eta Madrilen totalitarismoaren arteko borroka” bezala irudikatzeko. Nazioarteko hainbat hedabidetan ikuspegi hori lortzen ari zen babesak kezkatzen zuen gobernua. Generalitatearen “kanpaina mediatikoa” indargabetzen laguntzeko eskatu zien gobernuaren ordezkariak enpresariei, eta azken horiek baiezkoa eman zuten.

Nazioartean hitzaldi zikloa antolatu zuten. 2017ko azaroaren eta abenduaren artean egin ziren Parisen, Londresen, Bruselan, Berlinen, Erroman, New Yorken eta Washingtonen. Dena ohorezko presidente moduan Espainiako Erregea duen Real Instituto Elcanoren izenean, “enpresak gobernuaren ekimen bat finantzatzen ari zirenaren itxura ez emateko”. Aipatutako zortzi enpresak institutuaren patronatuan daude, eta urtero diru ekarpen bat egiten diote, baina kanpaina horretarako diru gehigarria jarri zuten, ordurako Elcano Institutuak bere aurrekontu ia guztia xahutua baitzuen. Diru laguntza horretarako baimena enpresa bakoitzeko presidenteak sinatu zuen.