Beti ezin da mailegatu, ez berrerabili. Adibidez, ikasgai eta maila jakin bateko testuliburuan egokitzapenak egin eta edizio berria atera badute, erostea beste erremediorik ez zaio geratuko familiari. Testuliburu %100 digitalak ere ohiko bihurtu dira Lehen Hezkuntzako 5. mailatik aurrera. Eta tronkalak ez diren ikasgaietan gero eta material berri gehiago dagoela ere azpimarratu dute adituek.

Oro har, gastu handiena ikas-materialean egiten da, baina liburuak, arropa, motxilak, matrikulak eta tasak, jangelarako materiala eta euskarri informatikoak ere gehitu behar dira aurrekontuaren zerrendara.

Espainiako Estatuko 1.000 pertsona galdekatu dituen Cetelem Behatokiaren arabera, EAEko biztanleek 497 euro bideratuko dituzte eskola-itzulerara, batez beste. Banqmi finantza erakundeak urtero egiten duen estimazioaren arabera berriz, Nafarroan 456,45 euro eta EAEn 431,67 bideratuko dituzte eskola-itzulerara, batez beste.

Gastua ahalik eta txikiena izan dadin, testuliburu eta materialen berrerabilera, bigarren eskuko azokak eta mailegutza izan ohi dira alternatibak. Kontsumobide Kontsumoko Euskal Institutuak eman dituen aholkuen artean, hain justu, ahal den neurrian berrerabiltzea gomendatu du: “Egiaztatu aurreko ikasturtetik sobera den materialik baden, trukatu beste familia batzuekin egoera onean dauden liburuak eta eskola-artikuluak”.

Laguntzak

Iaztik, curriculum-materiala erosteko Eusko Jaurlaritzaren programak DBH osoa hartzen du, ARGIAn kontatu genuenez. Hortaz, eskola publikoetako Lehen Hezkuntzako eta Derrigorrezko Bigarren Hezkuntzako ikasle guztiei zuzentzen zaie, 2024-2025 ikasturtetik, ikasmaterialean egiten den gastua diruz laguntzeko programa.

Udalek ere dirulaguntza bereziak ematen dituzte testuliburuen gastuari aurre egiteko.