Igande goizaldean agertu da txosnan argazkiak kentzera, Auzitegi Nazionalaren agindua betearaziz. Argazkiek “biktimak iraindu” ditzaketela ebatzi zuen Alejandro Abascal epaileak larunbatean.
Hainbat polizia auto gerturatu dira Bilboko Arenaleko konpartsen gunera igande goizean. Banan-banan, Txori Barrote konpartsaren txosnan eskegita zeuden euskal preso politikoen argazkiak kendu ditu poliziak. Ertzaintzak Auzitegi Nazionaletik heldutako agindua bete du.
Larunbatean, zaintzan dagoen Alejandro Abascal epaileak presoen argazkiak kentzeko agindua eman zuen, ETAren biktimak “iraindu” ditzaketela argudiatuta. Dignidad y Justicia elkarteak egindako eskaerari erantzun zion horrela Auzitegi Nazionaleko epaileak.
248 ohe huts
Presoen argazkiak zeuden tokian lelo bat jarri dute Txori Barrote konpartsako kideek: “248 ohe huts gehiago gure bihotzean! Maite zaituztegu!”.
