Errepidean babes neurriak eskatu dituzte ehunka txirrindularik Tolosan

  • Ehunka txirrindulari eta zale elkartu dira, Tolosan, ostegunean Leonen hil zen Villabonako bikoteari omenaldia egin eta berriro gerta ez dadin neurriak hartzeko eskatzeko. Gertatutakoa «onartezina» dela azpimarratu dute.

Artikulu hau CC BY-SA 3.0 lizentziari esker ekarri dugu.

2018ko uztailaren 02an - 13:56
Arg.: Tolosaldeko Ataria

 Jose Carlos Carrasco eta Nerea Agirre gogoan izan dituzte igande honetan ehunka txirrindularik Tolosan. Asko eta asko izan dira Oriako Txirrindulari Eskolaren deialdiari erantzunez Amarotz auzora agertu direnak.

Tartean ziren, esaterako, Carrasco eta Agirreren Leuneta zikloturista elkarteko lagunak. Hernani-Tolosa bidea egin dute, Villabonatik pasaz, berriro gerta ez dadin eskatuz. Txirrindulari profesionalak ere ez dira falta izan: Gorka Izagirre, Gari Bravo, Beñat Txoperena... Maite Izagirre, Amasa-Villabonako alkatea eta Olatz Peon, Tolosakoa, bertan izan dira. 

Gaurko deialdiak helburu bikoitza zuen, Aitor Ayerza, Oriakoko lehendakariaren hitzetan. "Alde batetik, Jose Carlos eta Nereari omenaldia egitea, baita Orats gaztetxoari ere. Bestetik, protesta ere bada. Errespetua eskatu nahi dugu, guztiok dugulako lekua errepidean". 

Amarotz auzotik hasita, bost kilometroko bidea egin dute guztiek batera, Tolosako erdigunetik. Ibilbidean zehar, irteera puntuan, bereziki, asko izan dira babesa ematera agertu diren herritarrak. Lazo beltzak jantzi dituzte guztiek.

Legeari begira

Legeari eta legelariei begira jarri dira guztiak gaurkoan, txirrindulariak babesteko neurriak hartzeko eskatuz. Hain zuzen, hori eskatu du Arritxu Iribar kazetariak martxaren irteera puntuan: hitzetatik ekintzetara pasatzea eta txirrindulariak babestea. Bera izan da Oriakoren izenean mezua irakurtzeaz arduratu dena. Hauxe da berak irakurritako testua, osorik:

"Nahikoa da. Horixe ateratzen zaigu bihotzaren erdi-erditik. Jose Carlos Carrasco, Nerea Agirre... ez zuen gertatu behar. Orats, 12 urterekin inork nahi ez duena bizitzea egokitu zaizu. Eta gu ez gaude prest. Ez gaude prest Jose Carlos, Nerea eta Orats gehiago izan daitezen. Hitzetatik ekintzetara pasatzea eskatzen diegu agintariei. Madrilgo kongresuan blokeaturik dagoen proposamenak aurrera egin dezala. Nahikoa da. Bizikletaz gozatu nahi dugu. Gidari, errespeta gaitzazu. Errepidean, ahulak gara. Bizikleta gainean, bizitza bat doa. Deskuidoak gerta daitezke, baina errepide indarkeria, trafiko indarkeria onartezina da. Eta horrekin bukatu egin behar dugu. Trafiko indarkeria da, eta onarterzina. Tamainako erantzuna behar du, neurriko legea aldarrikatu nahi dugu. Heziketa ere garrantzitsua izango da. Baina errepidean, gidari, errespeta gaitzazu. Guk, bizikleta gainean galtzeko dena baitugu. Oriako Txirrindulari Eskolaren izenean, eskerrik asko aldarrikapenarekin bat egin duzuen guztioi. Baina hemen gaude bakoitzaren eskubide bat aldarrikatzeko, samina adieraztearekin batera. Nahikoa dela aldarrikatuko dugu, gure defentsan ekintzak eskatuz".

Gorka Izagirre txirrindulariak legeak gogortzeko eskatu die agintariei: "Egun oso tristea da baina ezinbestekoa zen hemen egotea. Nahiko genuke gehiago ez gertatzea. Politikariei eskatzen diet legeak gogortzeko, behar duen zigorra emateko. Kontzientzia ere falta da". Gari Bravok gertatutakoa ezin dela errepikatu nabarmendu du: "Ezin da autoa edanda hartu. Horrelakorik ezin da ikusi, oso gogorra baita gertatutakoa. Ia egunero irteten gara errepidera eta horrelakoekin beldur gehiago hartzen diogu errepideari. Hala ere, oso garrantzitsua izan da jendeak izan duen erantzuna".

Olatz Peonek, berriz, zigorrak kaltearen neurrikoa izan beharko lukeela aldarrikatu du: "Izugarria da gertatutakoa. Istripuak askotan gertatzen dira, baina kaltea eragin duen pertsonaren ardura hor dago". Politikak zer egin lezakeen galdetuta, honakoa erantzun du Tolosako alkateak: "Legeak parlamentuan onartzen dira. Egin beharko litzateke batzorde bat osatu, legea egokia den ala ez begiratu, eta aldatu behar bada, aldatu".

Albiste hau Tolosako Atarian argitaratu du Mikel Iraolak eta ARGIAra ekarri dugu CC by-sa lizentzia baliatuta


Kanal honetatik interesatuko zaizu: Txirrindularitza
2023-10-29 | Jon Torner Zabala
Nola jan espazioa, espazioa jan duenari?

Martxoaren 22an, Frantziako Tourra hasteko 100 egun falta zirenean, Bilboko San Mames estadioan lur hartu zuen Juan Mari Aburto alkateak. Hainbat lagunek osatutako tropelaren erdian zihoan, Bilbaobizi alokairu-zerbitzuaren logoa zuen bizikleta elektriko gorri batean, erakusteko... [+]


Espainiako Vueltan errepideak euskal ikurrez betetzeko deia egin dute astebururako

Gure Esku eta Nafarroa Berriz Altxa elkarteek ekimenak antolatu dituzte lasterketa Euskal Herritik igarotzen denerako. "Euskal Herriaren erabakitzeko eskubidea" aldarrikatu eta "muga artifizialak" auzitan jarri nahi dituzte, besteak beste.


Bilbao ikurrinarekin zoriondu dute Tourrean: batzuk pozik, besteak hasarre

Pello Bilbao txirrindulari gernikarrak irabazi du astearteko Frantziako Tourreko lasterketa. Txapelketaren Twitter kontutik Espainiako bandera batekin zoriondu dute hasieran, baina bi minutu pasa ostean txio hori ezabatu eta ikurrina jarri diote. Pozez hartu dute batzuek, baina... [+]


Txirrindularitzarekiko zaletasuna turismoaren negozioa bultzatzeko baliatu nahi dutela salatu dute

Asteburuan Frantziako Tourraren 2023ko edizioa Bilbotik abiatuko da, eta lasterketak Euskal Herria zeharkatuko du lehenengo hiru etapetan. Ibilbidea Bilbon hasi eta, besteak beste, Gasteiz, Donostia eta Baiona hirietatik pasako da. Donostiako Bizilagunekin Plataformak Tourraren... [+]


Tourraren irabazleak eta... galtzaileak?

Frantziako Tourra hastera doan honetan, Bilbon hotelen prezioak izugarri garestitu dira eta luxuzko jatetxeetan tokirik ez dago aspaldi. Bizkitartean, ostalaritzako langileak greban dira, inflazioaren eta behin behinekotasunaren ondorioz galdutakoa berreskuratu nahian.


Eguneraketa berriak daude