Errefuxiatuei objektu baliotsuak konfiskatzeko lege proposamena adostu du Danimarkako Gobernuak
Danimarkara heltzen diren errefuxiatuen arropa eta ekipajeak miatu eta 10.000 koroa danimarkar –1.340 euro– baino balio gehiagoko objektuak eta eskudirua konfiskatzeko baimena izango du gobernuak. Kanpo geratuko dira mugikorrak, ordenagailuak, bitxiak, erlojuak eta balio pertsonal handiko objektuak.
Lars Lokke Rasmussen lehen ministroaren alderdi liberalak eta gobernua osatzen duten eskuineko alderdiek testuaren edukiaren inguruko akordioa lotu dute oposizioko alderdi nagusiarekin. Parlamentuan eztabaidatuko dute orain lege proiektua, baina, lau alderdien artean testua adostuta, aurrera ateratzeko babes zabala izango du.
Errefuxiatuek euren harrera kostuak ordaintzea nahi du gobernuak. Lehen ministroak argudiatu du eskubide unibertsalak dituen Danimarka bezalako gizarte batean, pertsona bakoitza, ahal duen heinean, bere kabuz mantendu behar dela. Lokkeren esanetan, danimarkar batek diru laguntzak jasotzeko 10.000 koroa danimarkar baino gutxiago izan behar ditu bankuan, eta beraz, ezinezkoa litzateke dirua duen errefuxiatu batek ezer ez ordaintzea. Danimarkako historian “gaizkien ulertu” den legea dela dio Lokkek.
Iazko abenduan aurkeztu zuten proposamenean objektuak konfiskatzeko muga 3.000 koroatakoa zen –400 euro–. Gobernuak proposamena moldatu behar izan du sozialdemokraten babesa lortzeko. Gobernuko kide den Alderdi Popular Daniarrak aldaketak onartu ditu, baina, errefuxiatuek daniarrek baino pribilegio gehiago izango dituztela kexatu zen.
Beste garai bateko praktika
Danimarkako Gobernuaren proiektua Naziek juduei egindako konfiskazioekin alderatu dute askok, eta Jens Rohde eurodiputatuak Alderdi Liberala uztea erabaki du. Italiako presidente Sergio Matarellak adierazi du errefuxiatuei euren objektuak konfiskatzea “zinismo hutsa” dela, eta beste garai batzuk dakartzala gogora. Danimarkako gobernuak aurpegiratu dio Danimarkak garapenerako lankidetzan inork baino diru gehiago inbertitzen duela, eta Italiaren aldean lan egiten ez duten errefuxiatuei diru laguntza ematen dietela.
Jonas Christoffersen Danimarkako Giza Eskubideen Institutuko kideak azaldu du legea onartuz gero konfiskazioez gain, besteak beste, errefuxiatuak euren familiekin elkartzeko itxaronaldia hiru urtera luzatuko dela. Izan ere, konfiskazioen inguruko neurria nabarmendu bada ere, parlamentuan eztabaidatuko dutena errefuxiatuen aurkako “neurri paketea” izango da.
Errefuxiatuen krisia hasi zenetik Danimarkako Gobernuak hauek hartzearen aurkako jarrera agertu du. Besteak beste, Libanoko egunkarietan errefuxiatuen laguntzak murriztu zituztela iragarri zuten Danimarka helmuga bezala ez aukeratzeko esperantzarekin.
Europar Batasunean migrazio politika gogorragoa ezartzeko ituna onartu du euroganberak, zortzi urtetako negoziazioen ondoren. Hala, eskuin-muturraren ideiei men egin eta arau baztertzaileak erabili ahal izango dituzte hemendik aurrera herrialdeek, kontrola areagotzeko eta... [+]
Migratzaileen kopurua anitz emendatu da Irun eta Hendaia arteko pasabidean. Irungo Harrera Sareak ohartarazi duenez, otsailean 600 pertsona lagundu dituzte, iaz, urte osoan 2.700 izan zirelarik. Iragan urtarrilean, 2.700 etorkin heldu dira Kanariar Uharteetara, egunero 80... [+]
Caminando Fronteras gobernuz kanpoko erakundeak “Monitoreo Derecho a la Vida” txostenaren edizio berrian egindako balantzea da: 6.618 hildako izan dira mendebaldeko Muga Euroafrikarrean; horien artean, 384 haur.
Europako Justizia Auzitegiak (EBJA) erabakia hartu du mugako barne-kontrolak berrezartzeko Frantziako Gobernuaren politikari buruz. Bidasoaren mugan ohikoak diren zenbait praktika. hala nola muga igarotzeko debekuak eta berehalako itzulketak, ez direla legearen araberakoak... [+]
2021eko abuztuaren 15ean, talibanek Kabul mendean hartu zutenean, milaka afganiar ihes egiten saiatu ziren. Soilik hilabete hartan, 35.000 pertsona baino gehiagok zeharkatu zuten Pakistango muga, eta 2022. urtea hasi orduko 145.000 ziren beste aldean. Aldiz, gertakari horien... [+]