Nafarroako Gobernuak 2008ko inkesta soziolinguistikoaren emaitzak eman zituen jakitera atzo. Datu ugari bildu dituzte, horien artean eremu ez euskalduneko herritarrek duten iritziari buruzkoak. Inkestaren arabera, Galar, Noain, Mañeru, Zirauki, Villatuerta, Artazu, Beraskoain eta Girgillao herrietako biztanleen ia %65ak desio du eremu mistoan sartzea. Nahiak nahi, inongo aldaketarik ez dutela egingo adierazi du Carlos Pérez-Nievas Hezkuntza kontseilariak. Bestalde, hiru nafarretik bik, euskaraz ikasteko aukera Nafarroa osoan egon dadila nahi dute, eta ez soilik –sare publikoari dagokionez– eremu euskaldun eta mistoan.