Askapenaren aurkako epaiketa amaitzear da. Bost auzipetuek datorren astelehenean jakingo dute zein den euren aurkako behin betiko zigor eskaera. Epaiketa politikoen aurkako mobilizazioa egingo da larunbat honetan Madrilen. Ekimena Madrileko Librek eta Euskal Herriaren Lagunek atondu dute, eta "elkartasunetik konpromisora igarotzera" deitu.
Antolatzaileen esanetan, euren aktibismo kultural, politiko eta internazionalistagatik ehunka militante eta kolektibo euskaldunek “epaiketa politiko bidegabeak jasan dituzte, egun jasaten dituzte eta jasango dituzte aurrerantzean”. Horren aurrean konpromisoari heltzea funtsezko jo dute. Horretarako, astean zehar Askapenaren aurkako auziaren inguruko hainbat hitzaldi eman dituzte, eta ginga larunbatean 18:00etatik aurrera eginen den manifestazioak jarriko du.
Bertakoak ez ezik, Euskal Herriko jendea ere izango da mobilizazio horretan; Madrilera joateko autobusak antolatu dituzte Euskal Herriko hainbat lekutan. Askapenako bost auzipetuek “elkartasun horren parte” izatera deitu dute.
Nolanahi ere, manifestazioan ez dute soilik Askapenaren aurkako epaiketa salatuko: lehenago izan diren auziak eta epaitzeke daudenak ere gogoan izango dituzte –azaroaren 16an Segurako auzia delakoagatik ezker abertzaleko 35 militanteren aurka egingo den epaiketa, kasu–.
Elkartasunaren aurrean, muturreko eskuinaren mehatxuak
Larunbatean egin behar den mobilizazioak haserrea piztu du hainbat talde ultraeskuindarren artean. Democracia Nacional alderdiak, esaterako, manifestazioari aurre egitera deitu du.
Los ProEtarras pretenden manifestarse en Madrid este Sábado. ¿Lo vas a permitir? Haremos FRENTE ¡ETA PENA DE MUERTE! pic.twitter.com/axefXFynSz
— @VotaDN (@VotaDN) October 28, 2015
Askapenaren aurkako epaiketa astelehenean amaituko da
Urriaren 19an ekin zioten Askapenaren aurkako epaiketari, eta astelehen honetan amaituko da. Pedro Martinez Torrijos fiskalak momentuz seina urteko kartzela zigorra eskatu du auzipetu bakoitzarentzat, Askapena “ETAren agindupean” zegoela argudiatuz. Hauentzako kartzelaratzeaz landa, erakunde internazionalista legez kanpo uztea ere fiskalaren eskaeren artean dago. Dena den, azkenean ez du Askapeña, Elkar Truke S.L., Herriak Aske S.L. eta Herriak Aske Kultur Elkartea legez kanpo uztea eskatuko.