Esaterako, ikuspuntu bitxia darabil Arpilleras: bordando la resistencia filmak: Brasilgo proiektu hidroelektrikoen erasana jasan duten emakume askok zaku-oihaletako brodatuak aukeratu dituzte haien egoerak eta borrokak adierazteko.

Frontera invisible filmak berriz, Kolonbian biodiesela ekoizteko erabiltzen diren palma afrikarren laborantzez eta herrialde hartan informatze hutsak suposatzen duen arrisku handiez hitz egiten du. Edo Kurdistaneko panorama berezira egiten du salto Día de la muerte del Agua lanak: bertan, zentral hidroelektrikoak eta urtegi handiak ez dira ura gordetzeko bakarrik erabiltzen ari, arma ere badira, besteei ura kentzeko edo, areago, herri batzuk uraren azpian desagerrarazteko.

Afrikaren auzia bi dokumental handitan izango dugu ikusgai: El otro lado de la tecnología eta Desierto líquido. Hondakinei buruzko eztabaidaren gordinenean, El otro lado de la tecnología sistema honek ekoitzitako soberakinei buruz mintzo da. Desierto líquido berriz, euskal zuzendariek ekoitzitako dokumentala da, itsasoaren gehiegizko ustiapenaz: ingurumenari eragiteaz aparte, kapitalismoak eta gehiegizko ustiaketak inpaktu zuzena du arrantzaz bizi diren komunitateetan.

Egitarau osoa lotura honetan kontsultatu dezakezu.