Barakaldoko Gazte Asanbladak jaki bilketa egin du duela aste batzuk Udalaren etxebizitza batzuetan sartu ziren hiru familiei laguntzeko. Ekimen honen bitartez haienganako elkartasuna adierazi eta euren egoera salatu nahi izan dute.
Herrikolore webgunean irakurtzen denez, familia horiek Barakaldoko Murrieta kalean hutsik denbora asko daramaten bi udal etxebizitza okupatu zituzten irailaren 21ean. Gazte Asanbladako kideek egoeraren aurrean Udalak harturiko jarrera gaitzetsi dute: “Egin duten lehen gauza kaleratzea agintzea izan da, elkarrizketarako ez dute tarterik utzi”.
Kaleratze agindua hilaren hasieran tramitatu zen, familiei etxebizitzak uzteko larunbat honetarainoko epea emanez. Egoera hori salatzeko Berri-Otxoak kolektiboa hainbat protesta eta ekimen ari da egiten. Iragan astean, esaterako, udaletxearen aurrean kanpin dendak jarri zituzten, kaleratze agindua betearaziko balitz familiek biziko luketen babesgabetasun egoera eszenifikatzeko.
Halaber, etxegabetzea saiheste aldera, kolektibo horretako kideek aipatu familiekin batera alegazioak aurkeztu dituzte. Haatik, Udalak kaleratze agindua beteko duela berretsi du. “Baikorrak gara, eta gertatzen dena gertatzen dela, borrokan jarraituko dugu”, adierazi du kalteturiko familia baten ordezkariak.
Udalak kaltetuen erroldatze eskaerei muzin egin die
Kaleratze aginduaz landa, hiru familia horiek beste buruhauste batzuk ere badituzte: Barakaldon erroldatzeko arazoak eta horrek dakartzan kalteak, hain zuzen. Berri-Otxoakeko kideek azaldu dutenez, familiek hainbatetan egin dute erroldatze eskaera, baina Udalak “entzungor” egin die. Eta horrek, kolektibo honen aburuz, babesgabetasun egoera areagotu egiten du, erroldaturik egon ezean ezin baitira larrialdi egoeretan eskaintzen diren baliabideak eskuratu.
Egoera horretan, Barakaldoko Gazte Asanbladaren ekimena bezalako elkartasun keinuak bilakatu dira hiru familia horien sostengu. Caritas Bizkaiak, esaterako, familietako bati arropa eta janaria eskuratzeko txartelak eskaintzen dizkio, eta beste biak San Vicenteko jantoki sozialera bideratu ditu.
Babes Ofizialeko Etxebizitzetan bizi dira familiak, eta La Caixak ez dizkie alokairu-kontratuak berritu nahi. Bilboko Etxebizitza Sindikatuak salatu duenez, bizilagunak kaleratuz, "alokairu sozialetatik aberasten da" banketxea. "Etxegabetzeak berehala eta... [+]
EAJren asmoa da legezko aldaketa azkar bati ekitea, 48 orduko epean etxegabetzeak egin ahal izateko etxebizitzak okupatzen diren kasuetan.
Bilatu dituzten beste etxeetako jabeek ez diete etxerik alokatu nahi izan familia ugaria, soldata bakarra eta atzerritar jatorrikoak izateagatik.
Pasaiako portuko langileen familiak bizi diren Trintxerpeko etxebizitza bloke bat bota nahi dute Pasaiako Portu Agintaritzak eta Euskal Trenbide Sareak, 400 metro inguruko trenbide zati bat egiteko. Lau hilabetetan etxea utzi behar dutela ohartarazi diete.